Chanchin thar thenkhat :

 LADC-ah Roll tlangzarh

Lai Autonomous District Council (LADC)-a Member of District Council (MDC) Inthlanpui  neih tur atana hman tur Electoral Roll siam thar chu nimin khan tlangzarh a ni ta a, MDC thlanna hi bial 25-a neih tura ruahman niin vote nei mipa 25,396 leh hmeichhia 26,146, an vaiin mi 51,542 an awm a, Draft Roll tarchhuah aiin Vote nei thei hi 260 in an tlem zawk a, hei hi Vote nei thei lo tur, Non-Tribal te paih an nih avang leh Vote nei kawp leh mitthi paih an nih vang a ni. LADC hnuaia MDC thlanna neih turah hian bial 25-ah hian Polling Station 111 awm tura ruahman a ni bawk.

I&PR Minister in MSU kawm

I&PR Minister, Lalruatkima chuan nimin khan Mizo Student Union (MSU) hruaitute chu a Pisa-a leng-ah sawmin MSU hruaitute kar hmasa lawka Zampui tlangdung leh khawthlang lama ramri chungchang leh thil hrang hrang enfiah a an kalna leh an hmalakna te a sawipui a, he hunah hian Mizoram leh Tripura inkalpawhna kawng siamthat ngaite leh motor lian kal theih tura kawng awmsa cheibawl bakah Bairabi Rel Station tih-changtlunna atana an rawtna te pawh sawiho a ni bawk a. Tuna Cachar lam nena kan inrinna a buai avanga Tripura lama chaklak theih dan pawh sawiho niin, hemi bakah hian Myanmar lam leh Manipur lam atanga chak lak dan leh hmalakna tur awm ang ang te pawh sawiho a ni bawk.

Zirlaite tanpuina pek phut

Zirlai mahni-a inchawm, Students' Self-Support Union (SSU) chuan sawrkar in Order a tihchhuah avanga Zirna In kai leh zirlai tam takin hri an kai chu pawi an tih thu leh vanduai-thlak an tih thu an sawi a. Heng zirlai vanduai te tan hian sawrkar in an inenkawlna tur senso tanpuina pe ngei se an duh thu sawiin, sawrkar chu zirlaite himna leh hriselna ngun taka ngaihtuaha, zirlaite hi sum tuakna an ni lo tih hriaa, mi tute emaw nawrna vang mai maia thutlukna siam lo tura an duh thu an sawi bawk.

Sawrkar in sum hmuh belh

Rural Development Minister, Lalruatkima chuan tun thla ni 22 khan sawrkar laipui atangin MNREGS (ni za inhlawhna) sum cheng vbc. 107 hmuh a ni tih sawiin, tun sawrkar kum kal mek ah hian April atanga October thla thleng Job Card neitu te ni 74 (days) inhlawhtir an ni tawh tih a sawi a. Tunah hian November leh December thla ah ni 7 ve ve inhlawh tir tura ruahman a nih thu a sawi bawk.

Union Minister rawn zin

Union Tribal Affairs Minister, Arjun Munda chuan nimin khan Lawngtlai tlawhin LADC a CEM, T. Zakunga leh MDC dang pasarih, tunhnai a BJP zawmtute chu BJP-ah a lawmlut a, he hunah hian Arjun Munda chuan Mizoram a Autonomous District Council ten inrelbawlna leh sum leh pai an hmuh danah dinhmun sang zawk an neih theih nan Sawrkar laipui chuan theihtawp chhuaha hma a lak thu a sawi.

Oil phur tur tir dawn

Tunhnaiah Mizoram-a nitin mamawh phurtu lirthei te Mizoram-a lut theilo tura Assam-ah dan an nih avangin Ngopa tlangdung atanga Manipur a Oil leh LPG phur tur lirthei 15 (Tanker 10 leh Truck 5) chu Vawiin hian tirh an ni dawn.