Damdawi In-a Ventilator dah belh zel avangin Health Department in lawmthu an sawi

Mizoram sawrkar-a Health & Family Welfare Department chuan Civil Hospital, Aizawl leh District Hospital hrang hranga COVID-19 dona atana mamawh em em Ventilator dah belh zel anih avanga an lawm thu an sawi.

Tunhnaiah Political Party thenkhat ten COVID-19 hri kai te enkawlna atana Ventilator hman tur chungchanga thuchhuah an siam hnuah Health & Family Welfare Department chuan Mizoram sawrkar hnuaia Hospital hrang hrang te Ventilator neih dan tarlanga thuchhuah an siamah Ventilator chu ICU-a awm ngei tur a nih laiin ICU chiah lo ah pawh mamawhna azira dah (install) a ni bawk thin tih sawiin, COVID-19 hripui len hmain Mizoram sawrkar Hospital hrang hrangah Ventilator 70 dah a ni tih an sawi a, heng zinga engemaw zat te chu District hrang hranga TRAUMA Centre a dah tur niin TRAUMA Centre te hi sak zawh an la ni lo na in Ventilator te chu mamawhna avanga hman ttngkai mek an nih thu an tarlang a. COVID-19 hripui a lo len takah hian Ventilator hi India sawrkar laipuiin nunna chhanna atan a pawimawh zia hriain State hrang hrangte a thlawnin a sem a, Mizoram sawrkar pawhin Ventilator 119 zet a dawng ve tih an sawi.

Heng bakah hian State Bank of India pawhin Mizoram sawrkar-ah Ventilator 10 chu pe in sawrkar laipui leh SBI atanga dawn hi a vaiin 129 niin heng Ventilator 129 te hi District Hospital hrang hrang leh Private Hospital-ah an mamawh dan azirin sawrkarin a thlawnin a pe chhawng ve leh mek tih an sawi a. Heng Ventilator te hi tunah hian Service Engineer-in installation ti mekin reilote ah hman theih an ni ang tih an sawi bawk a. Heng te leh Mizoram sawrkar a awm sa te nena belhkhawm hian Ventilator 199 zet Mizoram-ah a awm thu an sawi a ni.

Health Department chuan Civil Hospital Aizawl-ah ICU Khum (Ventilator hmanna Khum) 5 awmin, a belhchhah nan Khum 19 dah theihna siam peih tawh niin a thawktu tur te pawh sawrkarin a ngaituah mek thu leh tun atanga reiloteah hman theih tura beisei a nih thu pawh an tarlang a, State Referral Hospital/ZMC-ah ICU Khum 14 awm mek bakah Ventilator hman theihna tur (make shift ICU) khum 22 ruahman niin a tul huna hman theih tura peih a nih tawh thu an sawi bawk a. Hetianga hmalakna ah hian sawrkar chungah lawmthu an sawi a ni.