MGNREGS hnuaiah ni 62 inhlawhna siam a ni tawh

Rural Development Minister, Lalruatkima chuan MGNREGS hnuaiah kumin chhungin Job Card neite tan ni 62 inhlawhna siam a nih tawh thu a sawi.

Aizawl West-II Bial-a Veng 6-a chhungkaw 105 te hnena Puanthuikhawl semna hun nimin-a Aizawl Dinthar YMA Hall-a neih ah he thu hi sawiin Lalruatkima chuan Mizoram-ah Job Card 2,01,107 a awm mek thu a sawi a, Central sawrkar atangin kum kal mek (April 1, 2020 atanga Sept. 29, 2020) chhung hian ni 100 inhlawhna (Wages) sum dawn tawh chu cheng nuai 27907.90 a nih thu leh hemi hmang hian chawhrualin Mizoram chhunga thingtlang mipui, Job Card holders zawng zawngte inhlawhna ni 62 theuh siam sak tawh anih thu sawiin, thawktute thahnem ngaihna ah lawmthu a sawi bawk.

Tun dinhmunah Job Card Holder pakhat hian ni khatah Rs. 225/- zel hlawhin tun thla kal mek, September-ah hian mipui inhlawhna ni 10 dang thawh/buatsaih leh mek a ni tih pawh RD Minister chuan a sawi a. Thingtlang mipuite inhlawhna hi anmahni Bank Acount-ah direct-in dahluh sak mek zel an ni tih pawh sawiin, hei hian hripui leng mek avanga thingtlang mipuite harsatna pawh nasa takin a chhawk zangkhai nia an hriat a sawi bawk.

Rural Development Minister chuan Sept. 25, 2020 khan thing-tlang mirethei Insak tanpuina turin Central Share cheng nuai 500 leh State Share cheng nuai 121.274 chu Finance Department atangin Rural Development Department in an dawn thu pawh a sawi a, he sum hian thingtlang mirethei Insak tanpuina chhungkaw 191 tan 1st installment, chhungkaw 64 tan 2 installment leh chhungkaw 937 tan 3rd installment bakah chhungkaw 1562 tan 4th installment, a vaiin chhungkaw 2754 te Insak chhunzawmna tur a daih dawn tih a sawi a. Heng Insak tanpuina pawisa hi PMAY-G beneficiary-te account theuhah thun mek a nih thu a sawi bawk.

Comments

Chhiar Hlawhte