Statistical Abstract of Mizoram-2019 tlangzarh

 One State One Data kan neih theih nan theihtawp chhuah a tul - H. Rammawi

State Planning Board Vice Chairman, H. Rammawi chuan Mizoram chanchin leh chhinchhiahna hrang hrang tarlanna lehkhabu, ‘Statistical Abstract of Mizoram-2019’ chu nimin khan a tlangzarh a, One State One Data kan neih theih ngei nan theihtawp chhuah a tul thu a sawi bawk.

Directorate of Economics & Statistics buatsaih ‘Statistical Abstract of Mizoram-2019’ tlangzarhna hun Planning & Programme Implementation Department Committee Hall-a neih ah hian State Planning Board Vice Chairman, H. Rammawi chuan Data zawnga chanchin leh chhinchhiahna te chu State hmasawnna hna hrang hrang thawh nan a pawimawh dan te sawiin, Data chu hmasawnna inghahna bulpui a ni, a ti a. Department hrang hrangin data an neih dan te hun hmasa lama alo in mil thin loh avanga Minister a nih lai pawha harsatna a lo tawh dan te sawiin, One State One Data kan neih theih ngei nan theihtawp chhuah a tul thu a sawi bawk.

He hunh hian Planning & Programme Implementation Department-a Secretary & Commissioner, Dr. C. Vanlalramsanga chuan Data tel lovin ram sum leh pai dinhmun dehchhuah te, Sawrkar hnathawh leh hlawhtlinna te leh mipui dinhmun dik tak a hriat theih lova, chuvangin Official Data kimchang tak neih a pawimawh hle a ni, a ti a. Mizoram chu State naupang te ni mahse kum 2008 atang khan Data kimchang tak a hunbi in kan ti chhuak a, hetiang ti thei State hi India ramah tlemte kan awm a, chung zinga Mizoram kan tel thei hi a lawmawm a, Department a thawktute thawhrah a ni, tiin Sawrkar in Data a tihchhuahte chu Mizoram University-a Research bei mek ten an hmang tangkai hle niin a sawi bawk.

'Statistical Abstract of Mizoram, 2019' hi kum khat kar danah Statistical Handbook nena buatsaih thin a ni a. Tun tum ami hi a vawi 7 buatsaihna a ni. He lehkhabu hi kum 2019-a Mizoram dinhmun leh hlimthla, a number ang zawnga tarlanna bu a ni ber a. Mizoram Statistics pawimawh tak tak tarlan a ni a, Central Sawrkar leh State Sawrkar intawm Statistics 619, State Sawrkar Department Statistics 42, Non-Government Organisations Statistics 18, a vaiin, Statistics chi hrang hrang 679 chuang a huam a ni. He lehkhabu hi a duh apiang tan, en leh download theih turin Directorate of Economics and Statistics website, des.mizoram.gov.in-ah tarchhuah tum a ni bawk.