Chanchin thar thenkhat :

 Ruahmanna siam mek a ni

Health Minister Dr. R. Lalthangliana chuan mipuite hnenah thuchah sawiin, COVID-19 test chungchangah symptom nei, mahni inringhlel tel bawkte tan a thlawna sample test-sak turin rua-hmanna siam mek a nih thu leh, reilote ah ruahmanna kalphung kimchang nen an ti tan thei dawn tih a sawi a, COVID-19 symptoms kan tih mai, Khuh ro, Khawsik, Hritlang, Kawthalo, hrawk thip, rim hriatna hloh leh a dangte nei chuan a rang thei ang berin COVID19 helpline-ah inhriattir turin a ngen bawk. Health Minister chuan COVID-19 hri kai nih hi thil hlauhawm leh tihbaiawm angah ngai lo tura chahin, hri kai tawh te pawh a eng lam hawi zawngin rilru leh ngaihtuahna hmang tur leh theih-tawp chhuaha enkawl an nih thu a sawi bawk.

BSF Sipai enfiah hmasa zel

BSF (North East India) Inspector, General Sunil Kumar chuan Inrinni khan 131 Bn. BSF Melte, Lunglei tlawhin BSF mi leh sa, Mizoram lut tur te chu COVID-19 hrileng laka an fihlim leh fihlim loh enfiah vek an nih tawh thin thu leh hri vei lo chiah Mizoram-ah luh tir an nih tawh thu a sawi a. Tualchhung mite nen inlaichinna tha tak neih chu BSF ten an duh a ni tih sawiin, tualchhung mi ten BSF lakah beisei an neih leh ngaihmawh zawng te thlen zel se a duh tih a sawi bawk. BSF Inspector General chuan Bangladesh atanga ramdang mi lo lut tur dan chungchangah pawh theihtawp a an duty reng thu a sawi bawk.

Boruak bawlhhlawh ziaawm

Mizoram Pollution Control Board (MPCB) chuan Weekly Air Quality Index a tichhuak a, boruak bawlhhlawh dan a ziaawm. MPCB hian Mizoram hmun hrang hrang 11-ah boruak bawlhhlawh dan tehna a dah a, Ocober 5 leh 7 a Reading tichhuakin boruak bawlhhlawh dan a la ziaawm hle a, AQI range 0-50 chhungah vek la awmin AQI-a 50 chin hnuailam hi chuan mihring hriselna a nghawng theih danah harsatna a thlen meuh lo a ni.

BJP in theihtawp chhuah tum

BJP Mizoram Pradesh chuan Lai Autonomous District Council (LADC) Sawrkar, T. Zakunga kaihhruai in LADC chu ram leh hnam in awmze neia hma a sawn theih nan an awmna party Congress chhuahsan a, BJP an rawn zawm ta chu lawmawm an tih thu sawiin, mipuite beisei leh BJP a an luh chhan chu a taka an chan theih nan theih-tawp an chhuahpui dawn tih an sawi bawk.

Mipui tanrualna ropui ti

MPCC President, Lal Thanhawla chuan tunhnaia Mizoram leh Assam ramri-a buaina hrang hrang thleng chungchanga Mizoram mipui tanrualna chu ropui a tih thu nimin khan sawiin, hei hian ramri chinfelna kawngah nghawng tha tak a neih a beisei thu a sawi a. Mizoram leh Assam ramri chu awlsam taka chinfel mai theih a nih loh thu a sawi bawk.