Cheng nuai 54.33 senga Serchhip tuilakna tihchangtlun hna thawh zawhfel a ni

PHE Serchhip WATSAN Division in cheng nuai 54.33 senga Serchhip khawpui chhimlam chawmna tura IOC Booster Pump thuamthat hna an thawh chu zawhfel niin nimin tlai khan he khawl bun thar hi hlawhtling taka enchhin a ni a, he khawl thar hian nikhat-ah darkar 24 chhung Tui hi pump thei tura ngaih a ni.

Serchhip khawpui chawmna atan PHE Department in Tuikum lui tui an lak hi Khawtetlang-a Tuizem lian atangin pump leh ngai lovin hmun tam tak chawm thei mah se IOC Veng atanga chhimlam zawng pe tura Pump a tul avangin IOC Veng-ah hian Booster Pump siam a ni a, hei hi a tira atanga hman ni mah se kum 2011 khan a thar bun leh a ni a, hei pawh hi nikum October thla khan chhe lehin thawmthat ni mah se a chhe hlauh a nih chuan siamthat theih a nih tawh dawnloh avang leh Serchhip khaw mipui tam zawk chawmtu a nih bawk si avangin PHE Serchhip WATSAN Division-a Sr. EE, Er. F. Lalsanglura leh a thawhpuite chuan theihtawp chhuaha hma lain Department hotu sang zawk hnenah thlen a ni a, October thla tir khan he khawl thlakna tur hi chah thlen niin tunah chuan bun felin hman theih a ni ta a ni.

PHE Department hotute chuan tuna Tui pump khawl thlakna tur hi KSB Pumps India Ltd. kutchhuak niin cheng nuai 54.33 man a ni tih an sawi a, hei hian a khawl man, a bun man leh hun engemaw tichhung a enkawl man a tel dawn tih an sawi a, he khawl hmang hian meter 185-a sang ah darkar khat chhungin Tui litre 75,000 a pump thei dawn a, nikhat-ah darkar 24 pump thei tura ngaih a ni bawk.

He khawl thar hi tunkar Thawhlehni khan a bun hna thawh tan niin khawl thar bun chhung hian Tui pump theih a nih loh avangin mipui in tui-a harsatna an tawh loh nan thawktute chuan theihtawp an chhuah a. Nimin khan chhunzawm lehin tlai dar 4:15 khan hlawhtling taka enchhin niin PHE Serchhip WATSAN Division-a Sr. EE, Er. F. Lalsanglura pawhin a telpui a ni.

PHE hotute chuan Serchhip Town-ah Tui mamawhna a sang chho zel tih sawiin, tuna Tuikum-a Tui Pump khawl kan hman mek chu kum 1997-2021 chhunga nitin darkar 16 chhung Tui pump thei tura duan ni mah se tunah chuan nitin darkar 22-24 chhung an hman thin thu an sawi a, nitin tui litre nuai 26.5 vel mamawh ang kan nih thu an sawi bawk a ni.

Comments

Chhiar Hlawhte