Mizoram-a COVID-19 hri kai zingah za zela 95.05 te enkawl dam an ni tawh

Mizoram-a COVID-19 hri kai hmuhchhuah zingah za zela 95.05 chu enkawl dam an ni tawh a, nimin tlai thleng khan hri kai enkawllai 109 an la awm a ni. Sawrkar thuchhuah tarlan danin nimin khan Mizoram hmun hrang hrangah COVID-19 hri kai enkawl mi 46 te chu enkawl dam an nih hnuah anmahni enkawlna hmun atanga chhuahtir an ni a, heng zinga a tam ber, mi 37 te chu Lawngtlai District-a hri kai enkawl dam te niin ZMC atangin mi 3 chhuahtir an ni bawk a, heng bakah hian Beraw CCC, Zemabawk leh Chhiahtlang leh Champhai CCC atangin mi 2 theuh chhuahtir an ni bawk.

    Heti hian nimin thleng khan Mizoram-a COVID-19 hri kai hmuhchhuah chu mi 2202 niin nimin a enkawl dam te nen hian mi 2093 te chu enkawl dam an ni tawh a, hei hi hri kai hmuhchhuah zawng zawng atanga chhutin za zela 95.05 niin tunah hian hri kai enkawllai 109 an la awm mek a. Aizawl District chu hri kai enkawllai tamna ber la niin mi 40 an la enkawl mek a, Lunglei District-ah mi 32 enkawl niin Kolasib District-ah mi 19 enkawl an la ni mek bawk. Hetihlai hian Siaha, Champhai, Khawzawl leh Hnahthial District-ah te chuan hri kai enkawllai an awm tawhlo thung a ni.
    Niminpiah-a Mizoram-a Sample enfiah atangin COVID-19 hri kai mi 18 hmuh thar leh an ni awm a, ZMC Laboratory-ah Sample 462 enfiah niin COVID-19 hri kai hmuhchhuah an awm lova, District hrang hranga TrueNat Laboratory-ah Sample 109 enfiah niin COVID-19 hri kai mi 14 hmuhchhuah an ni a, Rapid Antigen Test hmangin Sample 673 enfiah niin hri kai mi 4 hmuh an ni bawk.Niminpiah a TrueNat Laboratory-a Sample enfiah atanga hri kai hmuhchhuah 14 zinga mi 8 chu Kolasib District-a hri kai hmuhchhuah niin an vai hian CIJW School, Vairengte a awm, hri kai te nen inkawmhnaih atanga hri kaichhawng an ni a, an zinga mi 6 te chu Assam-a enkawl tur niin Lunglei-a TrueNat Laboratory-ah hri kai 5 hmuh niin an vai hian Assam Rifles an ni a, Serchhip District-a TrueNat Laboratory atangin COVID-19 hri kai pakhat hmuhchhuah niin Assam atanga rawn lut a ni. Rapid Antigen Tet hmanga hri kai hmuhchhuah te hi Aizawl leh mamit District atangin mi 2 ve ve an ni thung.