Serchhip-ah Faina Hapta-2020 hawnna District Bawrhsap hovin neih a ni

India Hnampa, Mahatma Gandhi pianchamphaphak pualin nimin atang khan Mizoram-ah ‘Faina Hapta’ hman tan a ni leh ta a, he Hapta hawnna hi Serchhip-ah pawh nimin zing khan neih niin Hapta hman chhung hian faina kawnga inelna hrang hrang neih leh a ni ang.

Serchhip-a Faina Hapta hawnna hun hi nimin zing khan Serchhip Auditorium-ah neih niin Serchhip District Bawrhsap, Kumar Abhishek IAS chuan khuallian niin a hawng a, he hunah hian Bawrhsap chuan India Hnam pa, Mahatma Gandhi pianchampha denchhena kum 1977 atanga Mizoram-a Faina Hapta hman tan chu Serchhip-ah pawh kum 2003 atanga hman a lo ni thin chu lawmawm a tih thu a sawi a. Mizote thinlungah faina hian hmun pawimawh tak changin faina hnatlangte pawh khawtlang huapa neih thin a ni a, hei hi hnamdangte tan pawha entawn tlak a ni, a ti. Bawrhsap chuan VC te pawhin faina hnatlangte kalpui zel thin se a duh thu sawiin, he Faina Hapta hman chhung ngei hian Department tinin faina hnatlang vawikhat theuh tal neih thei se a duh thu a sawi bawk.

He hunah hian Bawrhsap chuan Swachh Bharat Mission (Urban) hnuaia IEC Activity pakhat, Faina inzirtirna atana Photography & Videopgraphy Competition, UD&PA Department leh Serchhip Photographers' Association tangkawpin an buatsaiha lawmman dawngtute hnenah thuziak leh pawisa fai a hlan nghal bawk a ni.

‘Faina Hapta’ hawnna hunah hian Serchhip District Urban Development Officer (DUDO), Vanthangpuii chuan kumin a Faina Hapta hman dan tur ruahmanna te tarlangin, District Sanitation Task Force ruahman angin Faina Hapta hman anih chhung hian VC tinah faina hnatlang nei theuh tura ngen an nih bakah Mizoram khawpui fai leh India ram khawpui fai inelna atana inbuatsaih nan thla khatah vawikhat tal faina hnatlang nei thin tura beisei an nih thu a sawi a. Faina chu Faina Hapta hman chhung chauh ni lovin engtik lai pawhin kan nun-ah bet tlat sela, hmasawnna neih tumin, Veng fai, Khawpui fai nih tum zel turin kalkhawmte a sawm bawk a ni.

Serchhip-a ‘Faina Hapta’ hawnna hun hi Serchhip Town Joint VC Chairman, Lalzuiliana chuan kaihruaiin inlawmna thu a sawi a, Serchhip khawpui chhunga VC hrang hrangte leh chanchinbu mite an tel a ni. Faina Hapta hawnna denchhen hian UD&PA kaihhruaina hnuaiah Serchhip Street Vendor te chuan Serchhip Bazar leh New Serchhip Bazar thenfai hna an thawk bawk a ni.