Chanchin thar thenkhat :

Rulchawm-ah In 7 thiat tawh

Saitual District chhung Rulchawm khuaa leimin in In pathum a chimpuina chu Inrinni khan bialtu MLA leh P&E Minister, R. Lalzirliana chuan a hmunah tlawhin leimin avanga In leh lo chan te chu thinlung takin a tawrhpui thu a sawi a. A tul angin sawrkarin hma a la chhunzawm dawn a ni, a ti. Zirtawpni-a he In chim avanga In pathum chhia te chu Inrinni khan senghawi hna thawh niin In chim 3- F. Kapliana, Hrangbawiha leh Thazeli te In bakah leimin hlauhawma awm In dang 4- C. Lalfakzuala, K. Thangzuala, K. Lal-chhuanawma leh Lalchhuanawma te In pawh thian nghal a ni a, F. Kapliana In hi RCC a nih avangin thiah zawh ala ni lova, Vawiin ah chhun-zawm leh tura ruahman niin R. Ralthatchhunga leh R. Lalnuntluanga te In pawh an bungrua thiar-chhuah sak an ni bawk. Rulchawm khuaa In chhia mi 7 te hi bialtu MLA hian Rs. 20000/- theuh a hlan a, Salvation Army Territorial ten pawisafai an hlan bawk a ni.

MLA hri kai enkawl dam

Mizoram-a MLA zinga COVID-19 hri kai hmuhchhuah hmasak ber leh MLA zinga hri kai hmuhchhuah awmchhun la ni mek, Dr. BD. Chakma chu enkawl dam a nih hnuah Inrinni khan amah enkawlna hmun, Khatla-a New MLA Hostel CCC atanga chhuahtir a ni a, Dr. BD. Chakma hian Sept. 13 khan COVID-19 hri a kai tih hmuh-chhuah niin tum thum a Sample enfiah a nih hnuah hri lakah fihlim in chhuahtir a ni ta a ni.

BSNL Office hawng leh tan

Siaha-a BSNL Service chhe lutuk a ziaawm theihna tura Mara Students’ Organisation (MSO) te hmalakna kal zela Siaha-a BSNL Office khar sak chu Zirtawpni khan hawn a ni leh ta a. MSO hruaitute leh BSNL hotute hian inbiakna neiin BSNL lam hotute hian theihtawp chhuahin hmalak an intiam avangin hawn a ni. BSNL leh MSO te hian inremna siamin Optical Power Ground Wire (OPGW) in Siaha a  thlen ve theih  nan MSO leh BSNL Office ten hma an la dun dawn a ni.

Inthlan hun tur la hriat loh

Kumin kumtawp lama Term hmang zo tur Aizawl Municipal Corporation (AMC) Councillor thlan hun chu a la hriat rih lo. Mizoram State Election Commissioner Laima Chozah IAS (Rtd) chuan hri leng avangin boruak an thlir mek tih a sawi a. “COVID-19 vei hi mi 2,000 chuang an ni tawh a, boruak kan en zel phawt loh chuan inthlan hun hi sawi  mai theih a ni lo,” a ti. Laima Chozah chuan AMC inthlanna atan hian roll ennawn hna an thawk mek nia sawiin, hmalam hun erawh sawi mai theih a la ni lo niin a sawi. AMC term kal mek hi November thla hian a tawp dawn a ni.

Power Line siam ah lawm

Lunglei District Congress Committee (LDCC) chuan P&E Department in chhimlam Lunglei, Lawngtlai leh Siaha District te tana kawlphetha pekna a neih chhun, Zuangtui to Serchhip Via Bukpui-ah harsatna an tawh thin te sutkianna tur Alternative Line, Melriat to Khawiva peihfel a lo ni ta chu lawmawm an tih thu thuchhuah siamin an tarlang a. He Line hi tluang taka hman anih zel theih nan a taka kalpui zel turin an beisei tih sawiin, mipui harsatna sutkianna tura sawrkar liamta, Congress sawrkar hmalakna chu lawmawm an tih thu an sawi bawk.