Mizoram-ah COVID-19 hri kai mi 8 hmuh leh an ni

Inrinni-a Mizoram-a sample enfiah zingah COVID-19 hri kai mi 8 hmuh leh niin an zingah hian zirna In zawm tura Aizawl-a let zirlai 2 an tel a ni.

Inrinni khan ZMC Laboratory-ah Sample 472 enfiah niin heng atang hian COVID-19 hri kai mi 4 hmuh niin an vai hian Aizawl District-a hri kai hmuhchhuah an ni a, an zinga mi 2 te hi Bilkhawthlir leh Lunglei a cheng niin, zirna In hawn tan leh a nih tak avanga Aizawl-a let, St. Joseph's Higher Secondary School zirlai niin hri kai nen inkawmhnaih atanga hri kaichhawng an ni. ZMC-a hri kai hmuhchhuah dang pahnih te hi hmeichhia ve ve niin Sumsuih khua leh Mission Veng an ni a, In lama inkhunghrang lai leh hri kai nen inkawmhnaih atanga hri kaichhawng an ni bawk.

Inrinni vek khan District hrang hranga TrueNat Laboratory-ah Sample 93 enfiah niin hri kai pahnih hmuhchhuah an ni bawk a, Lunglei District-a hri kai hmuhchhuah niin Assam Rifle sipai ve ve niin taksa-a hri kai lanchhuahna neilo an ni a. Rapid Antigen Test hmanga Sample 400 enfiah ah hri kai pahnih bawk hmuhchhuah niin Aizawl District-a hri kai hmuhchhuah an ni a, pakhat hi Kolkata atanga rawn haw, Lengpui Airport-a hri a kai tih hmuhchhuah niin pakhat hi Assam atanga rawn haw, Missionary a ni thung.

Mizoram-a COVID-19 hri kai hmuhchhuah tawh zingah nimin khan Beraw CCC-a enkawl mi pathum te chu enkawl dam niin anmahni enkawlna hmun atang hian chhuahtir leh a ni bawk a. Heti hian nimin tlai thleng khan Mizoram-a COVID-19 hri kai hmuhchhuah chu mi 2253 niin an zinga mi 2148 te chu enkawl dam an ni tawh a, hri kai hmuh tawh atanga zaa 95.34 te chu enkawl dam ni tawhin tunah hian hri kai enkawllai 105 an la awm mek a ni.