Tualchhunga hri kai te dam; Hri kai pakhat hmuh belh

Tun thla ni 19-a Serchhip damdawi In-a COVID-19 hri kai hmuhchhuah pahnih te chu enkawl dam niin nimin khan anmahni enkawlna hmun atanga chhuahtir an ni.

Nimin-a hri kai enkawl dam tak te hi tun thla ni 19-a hri kai tih hmuhchhuah leh tualchhunga hri kai nia hriat, an kaina hriatloh te an ni a, P&E Veng leh Chanmari Veng ami pakhat ve ve niin ni 10 chhung enkawl an nih hnuah nimin khan an Sample te enfiah a nih hnuah hri lakah fihlimin anmahni en-kawlna atang hian chhuahtir an ni ta a ni.

Hetihlai hian niminpiah khan Serchhip District-ah COVID-19 hri kai mi pakhat hmuh leh a ni a, he hri kai hmuhchhuah hi Serchhip District-a TrueNat Laboratory-ah Sample 16 enfiah atanga hmuhchhuah niin kum 18-a upa, tun thla ni 21-a Assam atanga rawn lut niin Prem Kram Infracon Pvt. Ltd. hnuaia thawk a ni a, inkhung-hranna hmuna awmlai niin Thenzawl AYUSH Hospital CCC-ah enkawl tura dah nghal a ni.

Niminpiah khan Serchhip District-ah Rapid Antigen Test hmangin Sample 7 enfiah niin hri kai hmuh erawh an awmlo thung a. Heti hian nimin thlengin Serchhip District-a COVID-19 hri kai hmuhchhuah chu mi 87 an ni ta a, an zinga mi 68 te chu enkawl dam ni tawhin tunah hian hri kai enkawllai 19 an la awm mek a ni.