SEDAL dinchampha ah lehkhabu pahnih tlangzarh

Serchhip District Academy of Letters (SE-DAL) chuan nimin khan an dinchampha lawmin an member te lehkhabu buatsaih pahnih chu an tlangzarh nghal bawk.

Serchhip District-a thu leh hla lama tui mi te intelkhawmna pawl, Ser-chhip District Academy of Letters (SEDAL) dinchampha lawmna hi CMS Picnic Spot-ah neih niin an pawl Joint Secretary, Samuel Saithuam-liana chuan a kaihruai a, he hunah hian an President, Lalhmangaiha Chawngthu chuan hripui leng avanga inkharkhipna hman chhunga an member mi pahnih te lehkhabu buatsaih- F. Kham-liana ziak 'Khawvel Sanapui' tih leh R. Lalrem-puia (Rempuia R Lutmang) lehkhabu tihchhuah 'Zotawng thu nawi' tih chu a tlangzarh a ni.

Heng lehkhabu thar pahnih te hi SEDAL Secretary, Laldinpuia chuan sawizauna a neih hnuah SEDAL President chuan tlangzarhin an Member te infuihtharna thuchah  a sawi nghal a, SEDAL chu pawl zahawm leh hlu a ni tih sawiin, SEDAL hmasawn zelna chu member tam leh tam lohah a innghat lova, a member inpe peih leh awmchhun te inpeknaah a innghat zawk tih a sawi a. An member mi 2 ten COVID-19 Lock-down chhunga awm mai mai lova lehkhabu an tichhuak thei chu lawmawm a tih thu a sawi bawk.

SEDAL Foundation Day hi an pawl din tan, kum 2003 atangin kumtin October ni 15-ah an remchan dan angin an lawm thin a. SEDAL te hian Serchhip-a thu leh hla in hma a sawn theih nan kawng hrang hrangin hma an lo la tawh thin a, Seminar te buatsaih thinin lehkhabu pawh 5 lai an tichhuak tawh bawk a ni.

SEDAL hian kum 2020-2022 chhunga an hruaitu tur thlanna neiin President-ah Lalhma-ngaiha Chawngthu; Vice President-ah Dr. R. Lalmakthanga; Secretary-ah Laldinpuia; Joint Secretary-ah Samuel Saithuamliana; Treasurer-ah Lalthlamuani leh Fin. Secretary-ah C. Lalram-liana te thlantlin an ni.