Party hrang hrang thu leh hla

@@@ Mizoram Pradesh Congress Committee (MPCC) Media Department chuan nimin khan thuchhuah siamin MNF kaihhruai sawrkar in an chan thatna chauh thlira mipui hriselna leh himna pawh pawisa lova Local Council leh Village Council inthlan an kaltlangpui luih laia an Party himna atana Block inthlan an thulh leh si chu an dem takzet tih an sawi a. MNF party hamthatna chauh thlir lova Mizoram mipui himna leh hriselna thlir hmasa zawk zel tura an phut thu an sawi bawk.

@@@ MNF Party chuan nimin khan thuchhuah siamin tunhnaia Lalduhoma disqualification case kal lai mek chungchang dawt-a thu thehdarhtu zawngchhuak tura CM Office thiltih chu tih tur dik tak a nih thu an tarlang a. “Thudik lo, zeldin thu-bawl dawt phuahchawp mai mai hmanga Chief Minister zahawmna tihhmelhem tumtute zawng chhuak tura FIR an thehlut nghal hi Chief Minister leh a Office (CMO) zahawmna leh hlutna venhim nana tih ngei ngei tur a ni zawk a ni,” an ti bawk.

@@@ Zoram Peoples’ Movement (ZPM) Southern Hqrs. chuan Oct. 8, 2020-a MNF MLA ten Press Conference neia Speaker hnena Oppostion MLA, Lalduhoma an hekna chu amah huat vang ni lova Dan an ngaih pawimawh vang zawk nia an sawi chu mipui hnena hmai phihna lek a ni tih thuchhuah siamin an tarlang a. “A hektu zawk an insawifiah chiam leh CM hriatpui loha thil ti nia an insawi kha mipui nuih an ti za hle a ni,” an ti bawk.

@@@ Peoples' Conference (PC) Party chuan nimin khan a vawikhatna atan Aizawl-a an Office-ah OB Meeting neiin Party hmalak dan tur an rel bakah General Secretary te hna chanpual siamrem a ni bawk.

@@@ BJP Mizoram Pradesh chuan nimin khan Aizawl-a an Party Office-ah ‘National Education Policy-2020’ sawihona hun an buatsaih a, he an sawihona atanga ngaihdan an neih te chu sawrkar laipui-ah an thlen leh dawn a ni.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn