Mizoram-ah COVID-19 hri kai mi 10 hmuh leh an ni

Niminpiah-a Mizoram-a Sample enfiah zingah COVID-19 hri kai mi 10 hmuhchhuah belh leh niin Mizoram-a hri kai hmuhchhuah chu 2212 an tling tawh.

Niminpiah khan ZMC Laboratory-ah Sample 291 enfiah niin heng atang hian hri kai hmuhchhuah an awm lova, District hrang hranga TrueNat Laboratory-ah Sample 80 enfiah niin hri kai 2 hmuh niin Rapid Antigen Test hmanga Sample enfiah 582-ah hri kai hmuhchhuah thar 8 an awm bawk. TrueNat Laboratory-a hri kai hmuhchhuah thar te hi Champhai District leh Lawngtlai District-ah mi pakhat ve ve niin State pawn atanga rawn lut leh inkhunghranna hmuna awm te an ni a, Company hnuaia thawk tur an ni bawk.

Niminpiah a Rapid Antigen Test hmanga hri kai hmuhchhuah mi 8 zinga mi 7 te hi Aizawl khawpui chhunga hri kai hmuhchhuah niin Dawrpui Veng-ah mi 4 leh Chanmari West-ah mi 3 te an ni a, zinchhuahna neilo vek niin Dawrpui Veng ami te hi hri an kaina hriat a ni lo a, Chanmari West ami te hi hri kai hmuhchhuah tawh te nen chhungkaw khat-a cheng ho an ni thung. Niminpiah a Rapid Antigen Test hmanga hri kai hmuhchhuah pakhat hi Kolasib District-a hri kai hmuhchhuah niin CIJWS-a thawk, Vairengte mi a ni thung.

Heti hian nimin thleng khan Mizoram-ah COVID-19 hri kai hmuhchhuah chu mi 2212 an tling ta a, nimin khan Mizoram hmun hrang hrang atangin hri kai enkawl dam mi 15 chhuahtirin nimin thleng khan hri kai 2108 enkawl dam niin hri kai hmuhchhuah atangin zaa 95.30 enkawl dam an ni tawh a, hri kai enkawllai 104 an la awm mek a ni.

India rama hri kai zingah zaa 11.42 enkawl mek an ni :

India rama COVID-19 hri kai hmuhchhuah zawng zawng atangin hri kai enkawllai chu zaa 11.42 chiah an ni ta a, hri kai hmuhchhuah atanga zaa 87.05 te chu enkawl dam an ni tawh. Darkar 24 kalta chhung khan India ramah sample 11,45,015 enfiah leh niin heng atang hian hri kai hmuhchhuah thar 63,509 an awm a, hemi hun chhung hian hri kai mi 74,632 te chu enkawl dam an ni leh thung a ni. Heti hian nimin thleng khan India ramah Sample 9,00,90,122 enfiah ni tawhin hri kai hmuh tawh zawng zawng chu 72,39,389 an ni a, heng atang hian mi 63,01,927 te chu enkawl dam niin hei hi hri kai hmuhchhuah atangin zaa 87.05 niin tunah hian hri kai enkawllai 8,26,876 an awm a, hei hi hri kai hmuh tawh atangin zaa 11.42 a ni.

India ramah hian hri kai zingah nunna chan an la awm belh ve zel a, darkar 24 kalta chhunga nunna chan mi 730 nen nimin thlenga hri kai nunna chan chu 1,10,586 niin hei hi hri kai hmuhchhuah atangin zaa 1.53 a ni thung.