Chanchin thar thenkhat :

Falkawn-ah SRHF Clinic hawng

Nimin khan Falkawn-ah State Referral Hospital, Falkawn (SRHF) Clinic chu SRHF Medical Superintendent, Dr. HC. Laldina chuan a hawng. COVID-19 hri leng vanga sawrkarin Referral Hospital & Zoram Medical College chu COVID-19 Hospital atan bik zuah hran avangin COVID-19 natna nilo, damlohna dang neite inentir leh inenkawlna kawngah Falkawn leh a chhehvel khua ten harsatna nasa tak an tawk a. Mipuite harsatna sutkian a nih theih nan Falkawn VC in sawrkar-a an ngenna tihpuitlin nan Falkawn khua ah hian Clinic hi hawn a ni ta a ni. Clinic-ah hian Thawhtanni atanga Zirtawpni thlengin Specialist hrang hrang thuin inentirna hawn a ni thin dawn a ni.


Bawrhsap hovin sawihona nei

Nimin khan Lawngtlai-ah District Bawrh-sap, Dr. Andrew H. Vanlaldika hovin Lawngtlai District chhunga inbiakpawhna leh internet service tihchangtlun dan tur leh hmasawn theih dan tur hrang hrang sawiho niin BSNL leh Airtel bakah Jio aiawhte an tel a. He thutkhawma tel Service Provider-te chuan an harsatna tawh hrang hrang sawiin, khawl chak tawk tawhlo leh consumer tam zel vanga khawl-in a zawh loh te, Tower din belh ngai te, khuarel leh mihring kut avanga hrui chat nasa te, thawktu indaihlohna leh COVID-19 vanga an harsatna tawh hrang hrangte an tarlang a. Heng harsatna hrang hrangte hi chinfel a nih theih dan tur sawi ho nghal a ni.


Chief Minister kawm

Mizoram Planning, Economics and Statistical Service (MPESS) 2020 Batch te chuan nimin khan Chief Minister, Zoramthanga chu a Pisa-ah kawmin Chief Minister chuan MPESS Officer tharte chu Zoram tana mi tangkai tak an nih theih nan an hmabak ah theihtawp chhuah turin a lo fuih a. Sawrkar inrelbawlnaah Planning pawimawh thu pawh sawiin, training an neih ah pawh thahnem ngai taka inzir turin a lo fuih bawk a ni.


ZPM Secretary General ruat

Zoram People’s Movement (ZPM) Party General Hqrs. a hruaitu, Office Bearers turte puan-chhuah an nih hnuah OB te thukhawm chuan ZPM Secretary General atan P.C Vanlalruata chu an ruat thar.


CM Relief Fund dinhmun

COVID-19 hri leng dona atan nimin thleng khan mi tlawmngai ten Chief Minister's Relief Fund for COVID-19 a sum an chhunluh tlingkhawm chu Rs. 21,55,22,836/- a tling tawh a, heng atang hian Rs. 19,50,26,013/- chu hman a ni tawh thung.

Comments

Chhiar Hlawhte