Chanchin thar thenkhat :

 MZP in Saihapui V tlawh

MZP General Hqrs. hruaitute chuan nimin khan an President, B. Vanlaltana hovin Saihapui V an tlawh a, he hunah hian MZP President chuan Assam lamin min nekna leh vauna karah sawrkar leh Police hmalakna lawmawm a tih thu sawiin, “Assam hovin an duh hun hunah kawng an rawn dang a, an duh hun hunah an rawn tlang tir a, an tel lova awm theilo ah hian min ngai hi a tlawm thlak takzet a, kawng an rawn tlang tîr lo a nih chuan, Mizo mipuite zahawmna humhim nan sawrkar hotute pawhin Assam sawrkar engti kawng pawha be lo turin kan duh a ni,” a ti. He hunah hian an Adviser, L. Ramdinliana Renthlei pawhin tuna kan buaina chu ramri kaihhnawih a ni tih sawiin, “Mizoram Sawrkar hian a ramri hi tichiang sela, hemi hmang hian Map siam rawh se,” a ti bawk.

MSU in CM-ah rawtna thlen

Mizo Students’ Union (MSU) General Hqrs. hruaitute chuan nimin khan Chief Minister, Zoramthanga chu a Office-ah hmuin Mizoram leh Tripura ramri a buaina awm chungchang leh ramri humhalh anih theih nana ramri dep a awm Mizo khuate tih hmasawn chungchang an sawipui a. He hunah hian MSU hruaitute chuan Tripura ramri dep a awm Phuldungsei panna kawng (Kawrte to Phuldungsei via W. Mualthuam) chu siamthat nise an duh thu leh Phuldungsei khua a High School din tul an tih thu sawiin, High School hi a ding anih chuan Zampui tlangdung-a Mizo awmte nena min phuarkhawmtu pawimawh tak a nih tur thu an sawi a. Chief Minister chuan kawngpui hi a ranglama siamthat a nih theih nana hma a lo lak tur thu sawiin, High School din pawh a tul anga alo bawhzui tur thu a sawi bawk a ni.

Sawrkar in Contract titawp

Tunkar Thawhtanni zan-a Sakawrdai nula laka mawilo taka che-a puh, National Health Mission hnuaia Contract-a thawklai, Dr. JH. Van-lalnunmawia chu sawrkar chuan Ningani khan NHM hnuaia a contract a tihtawp sak.

Ex-MNA in dodal zel an tum

Ex-Mizo National Army (Ex-MNA) Association General Hqrs. chuan nimin khan Aizawl a Mizo Hnam Run-ah thutkhawm neiin tunhnaia ramri-a buaina hrang hrang an sawiho a. An President, Rochungnunga chuan Cachar nena kan ramri ah diklo taka Assam ho an rawn che ta mai chu an duhlo tih sawiin, a tawp thlenga an dodal tur thu a sawi a, “Hetiang huna hruaitu innghahna tlak Chief Minister leh Home Minister huaisen, ram hmangaihtu leh Mizoram hum ngam kan nei hi kan vannei hle a ni,” a ti. Ex-MNA Association hian nimin zing khan Chief Minister leh Home Minister hnenah ramri chungchang thil hrang hrang an thlen bawk.

Inkang-ah naupang boral

Nizan hmasa dar 6:30 vel khan Selesih Vety College Quarters building chhawng 5 a sang chu kangin naupang pakhat in nunna a chan phah. Thudawn danin he Quarters hi chhung-kaw 20 luah a ni a, a chhawng hnuai ber dawttu atanga kangmei hi intan a nih avang leh inkal-pawhna lai a kan nasat avangin a chunglam luah te an tlanchhuak thei lova, tukverh atanga zuang chhuak leh Inchung atanga uaithla te pawh an awm a, kangmei chhuah chhan hi hriat a la ni rihlo. Kangmei chhuakah hian hmandang pathum leh Mizo pakhat in hliam an tuar a, naupang kum 2 mi Afrin chu damdawi In panpui a nih hnu nizan hmasa dar 10:00 vel khan a boral a ni.