Chanchin thar thenkhat :

Dy. CM in lawmman sem

Aizawl Municipal Corporation (AMC) huamchhunga Local Council te tan ‘Best Performing Local Councils in Segregation of Waste-2020’ lawmman semna chu nimin khan Aizawl Vanapa Hall-ah neih a ni a, he hun hi Deputy Chief Minister, Tawnluia chuan khuallian niin a hmanpui a ni. Nimin a ‘Best Performing Local Councils in Segregation of Waste-2020’ semna ah hian College Veng Local Council chuan lawm-man pakhatna dawngin Rs. 50,000/- hlan an ni a, Chawnpui Local Council leh Upper Republic Local Council ten dawtin Khatla LC, Saron Veng LC, Dinthar LC, Armed Veng ‘S’ LC leh Bethlehem Veng LC ten Consolation Prize an dawng bawk a ni.

H&TE Minister in hmanpui

Aizawl-a Govt. Hrangbana College in kumin a zirlai kai thar te lawmna leh Magazine tlangzarhna hun nimin-a an College Golden Hall-a an hman chu Higher and Technical Education Minister, Dr. R.Lalthangliana chuan khuallian niin a hmanpui a, zirlaite chu eng dinhmunah pawh ding se, theihtawp chhuaha tang te tan chuan hlawhtlinna kawng a inhawng tih hre turin a chah a, “Tih tak takna, tumruhna leh taimakna chu khawvel kan hneh theihna tura thil pawimawh a ni,” a ti bawk. Govt. Hrangbana College hi 1980-ah din niin 1985-ah deficit ah hlankai a ni a. Kum 1995 ah Permanent Affiliation neiin kum 2003 ah Pro-vincialised a ni a. tun dinhmunah zirlai 1955 neiin kumin ah zirlai thar 810 an nei a ni.

Hri kai enkawl dam pung zel

Niminpiah-a Mizoram-a Sample enfiah ah COVID-19 hri kai mi 7 hmuh belh an nih laiin nimin khan 37 enkawl dam an ni a, niminpiah a hri kai hmuhchhuah te hi State pawn atanga rawn haw te vek an ni. Heti hian nimin thleng khan Mizoram-ah COVID-19 hri kai hmuh chu mi 2157 an tling tawh a, an zinga mi 1974 chu dam tawhin za zela 91.52 enkawl dam an ni tawh a, hri kai enkawllai 183 an la awm mek a ni.