Zemabawk-ah leimin in In 3 leh Motor 2 a hnawl

Nimin chawhnu dar 3:00 vel khan Aizawl atanga Tuirial panna, Zemabawk Kananthar Veng-ah kawngchhak leimin in chenna In pathum a hnawl a, mihring leh lirthei kaltlang theihloh in a awm mek.

Thudawn danin kumin Feb. 2 khan kawngchhak lam-a mimal In sakna tur laih avangin helai hmunah hian lei minin chenna In pakhat alo chhe tawh a, tunhnaia ruahsur nasa avang khan a che leh a, nizan hmasa khan chhungkaw pakhat chu inthiarchhuakin nimin chawhnu khan a che nasa zual a, chawhnu dar 3:00 vel khan kawngchhak lam hi rawn minin kawngpui thlanglam-a chenna In 3- RCC Building pahnih leh Assam Type pakhat te chu a hnawl a, City Bus leh Car pakhat pawh leimin hian hnawlin mihring thi leh hliam erawh an awmlo thung. He leimin avang hian a bula chhungkaw pakhat pawh an bungrua thiarchhuah nghal a ni bawk.

He leiminna hmun hi la che zui thei nia a lan avangin leh kawngchhuat thenkhat pawh a tlakhniam avangin leimin thenfai hna hi thawh theih ala ni lo a, tunah hian lirthei leh mihring tana kaltlang theihlohin a awm mek a ni.

Vanduaina thlenna hmun hi nimin vek khan bialtu MLA leh Chief Minister, Zoramthanga chuan a hmunah tlawh nghalin khawtlang hruaitu ten an lo dawngsawng a, vanduaina tawktute a tawrhpui thu sawiin, hmalak zel dan turte an sawiho a, sawrkar dan dinglai angin chhawmdawlna pawh ruahman a nih tur thu a sawi bawk. Chief Minister hian Local Council hnenah a tul anga hman turin Rs. 20,000/- a hlan nghal bawk a ni.