Health Department hmalakna thlirho a ni

Health & Family Welfare Department-in COVID-19 hripui leng dona kawnga an hmalakna bakah Mizoram hriselna atana Department hmalakna hrang hrang thlirhona chu nimin khan neih a ni.

Health Minister, Dr. R. Lalthangliana hova SAD Conference Hall-a thutkhawm ah hian Virus Research and Diagnostic Laboratory (VRDL) bun tura chak taka hmalak a nih thu tarlan a ni a, Laboratory awmna tur building sak hna pawh a chanve vel thawh tawh a nih thu tarlan niin, a khawl bun tur pawh a rawn thleng kim tawh a, thawktu mi 10 vel mamawh niin anmahni chhawrna tur pawh ICMR hian a tum dawn a, Mizoram sawrkar chuan khawl mamawh bawlhlo man a tum ve thung dawn a ni. Research Laboratory-a hman tur a nih angin virus vanga natna hrileng chi hrang hrangte he khawl hmang hian hmuhchhuah theih a ni dawn a, damlo phai lam pan thin engemawzatin pan ngai lovin an chhawr tangkai thei dawn a, Doctor te tan pawh an hnathawh kawngah nasa takin a tanpui thei dawn a ni.

He huna tarlan a nih danin tun dinhmunah Mizoram-ah Covid Care Centre (CCC) 41 leh Community Covid Care Centre (CCCC) 5 awmin, Aizawl District bikah 25 a awm mek a, COVID-19 hri kai 500 vel tum khata enkawlna tur BSUP building, Durtlang ami chu peihfel vek tawh niin an hnawmhnawk (bio-medical waste) phumna tur pawh UD&PA in an lai dawn a ni.

Rapid Antibody Test (RAbT) Test kit COVID-19 Mizoram in kan hmelhriat tirh khan thahnemtak lei a nih thu tarlan niin, la hman zawh loh engemawzat la dahthat a awm tih tarlan a ni a, heng Test kit te hi District hrang hranga population-based 'sero survey' neihna tura ruahman niin hei hian Community Spread a awm leh awm loh chungchangah te leh thil dangah tangkai takin a pui thei dawn tih tarlan a ni bawk.

Hei bakah hian RAgT hmanga test duh tan awlsam taka test zung zung theihna tur Mobile Testing, ‘kiosk’ bunna tur pawh ruahman fel a nih tawh thu leh, a buatsaihna atana tih tur tul te buaipui mek a nih thu tarlan a ni a. Home Isolation a awm mekte zawm tur SOP chu ennawn a belh ngaite a awm dawn thu pawh tarlan a ni a, Mizoram State Health care Scheme-ah pawh kum hmasa aia inziaklut an thathnem tawh thu tarlan niin a ni bawk.

Health Minister Dr. R. Lalthangliana chuan COVID-19 hri kai hmuhchhuah a tlem tak avanga inthlahdah palh a pawi thei tih sawiin, tunlaia hri kai hmuhchhuah tharte chu symptom nei an nih tlangpui tawh avangin kan fimkhur lehzual a tul hle tih a sawi a, mahni inringhlel emaw, positive contact nei an awm emaw a nih chuan a rang thei ang bera in test zel a pawimawh tih a sawi bawk.