Ramri-a buaina chungchangah Union Home Minister in Mizoram Chief Minister a rawn bia

Tunhnaia Mizoram leh Assam ramri-a buaina thleng chungchangah Union Home Minister, Amit Shah chuan nimin khan Mizoram Chief Minister, Zoramthanga chu rawn biain boruak tha zawk a awm zel nan theihtawp a chhuahpui tur thu a rawn hrilh.

Nimin-a Union Home Minister in Mizoram Chief Minister a rawn biakna ah hian Union Home Minister chuan Mizoram leh Assam ramri a harsatna awm chu pawi a tih thu sawiin, boruak tha zawk a awm zel nan theihtawp a chhuahpui tur thu a rawn hrilh a. Chief Minister chuan Assam a cheng mi thenkhatin Mizoram chhung hmun thum ngawt a buaina an rawn siam chu hriatthiam harsa a tih thu leh, Assam a inthlanpui awm tur thlira Local Politician thenkhatin mipui rilru hruaikawia buaina rawn siam ta nia an ngaih thu a hrilh a. Assam leh Mizoram inkalpawhna kawngpui Assam chhunga danpin/block chuan Mizoram mipuite tana nitin mamawh chawkluhna an chhuchat rih tihna a nih avangin mipui ten ei leh bara harsatna an tawh loh nan Tripura leh Manipur bakah thenawm ram, Bangladesh leh Myanmar atanga mamawh lakluh dan Mizoram tan chuan zawn mai a ngaih tur thu a hrilh bawk a. Union Home Minister chuan chutiang kawng dang dap ngailo turin he harsatna hi sutkian a nih thuai tur hrilhin, boruak tha zawk a awm thuai a beisei thu a sawi a ni.

Mizoram Chief Minister hi DoNER Minister, Jitendra Singh leh Union Home Secretary, Ajay Bhalla in a rawn be ve bawk a. Assam Chief Minister, Sarbananda Sonowal pawhin State pahnih te inkara harsatna thleng chu pawi a tih thu rawn hrilhin, Assam atanga ei leh bar lakluh kawngah Mizoram in harsatna an tawh lohna turin theihtawp chhuah anih tur thu a rawn hrilh a. Chief Minister hi Assam Home Minister, Himanta Biswa Sarma nen inbe tawh bawkin, boruak muanawm zawk awm thuai se an duh thu an sawi a ni.

Information & Public Relations Minister, Lalruatkima chuan he boruak kan tawn mekah hian mipuite hnam anga tangrual tlat tura chahin, nitin mamawh lakluh lamah harsatna awm rih mahse chiai mai lovin leh buhfai pawh tunah kudam-ah thla thum daih stock a awm thu leh, sawrkarin hma a la zel tih hriatpui bawk tura a duh thu a sawi a. Chutihlai chuan inrenchem thiam turin mipui a chah bawk a ni.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn