COVID-19 chungchanga Dan bawhchhia te pawisa chawitir theitu leh chawi tur zat puangzar

Serchhip District Bawrhsap, Kumar Abhishek chuan thuchhuah siamin COVID-19 chungchanga dan bawhchhia te pawisa chawitirtu turte leh an chawi zat turte a tarlang.

Hemi chungchanga September 29, 2020-a Serchhip District Bawrhsap thuchhuah chuan Mizoram Sawrkar chuan COVID-19 do nan ‘The Mizoram (Containment and Prevention of Covid-19) Ordinance, 2020’ chu May 3, 2020-ah Mizoram Gazette-ah chhuahin he thuchhuakah hian COVID-19 chungchanga dan bawhchhiatna te, dan bawhchhetute hrem theihna dan te leh pawisa chawitir theitu te tarlan a ni tih a tarlang a. Hemi ang hian pawisa chawitir theitu te chu Executive Magistrate, Dan kengkawhtu Sawrkar in thuneihna a pek, Police Officer, Constable aia hniam lo, State Level Task Force on COVID-19 a Chairman, Vice Chairman leh Member Secretary te, District Level Task Force on COVID-19 a Chairman, Vice Chairman leh Member Secretary, Village leh Local Level Task Force on COVID-19 a Chairman, Vice Chairman leh Member Secretary te an ni.

Dan bawhchhia an awma hrem pawisa chawitir an nihin a hremtuin receipt a pechhuak tur a ni a, pawisa dawn te chu thlatin Deputy Commissioner, Serchhip hnenah chhunluh tur niin Vantlang hmuna hmai tuamlo chu Rs. 100/- chawitir tur a ni a, Vantlang hmuna inhnaih chilha awm, Social distancing zawm lo chu Rs. 200/- chawitir tur niin Vantlang hmuna Chil chhak chu Rs. 300/- chawitir tur a ni. Thuneitute phalna la hmasa lova khawtlang emaw, Sakhuana emaw lam thila punkhawmna huaihawt chu Rs. 5000/- chawitir theih niin Thuneitute phalna la hmasa lova Mizoram chhuahsan emaw Mizoram-a lut te pawh Rs. 5000/- bawk chawitir theih an ni.

Hei bakah hian huntiam zawh hmaa Quarantine-na leh Isolation-na hmun chhuahsan te chu Rs. 1000/- atanga Rs. 5000/- chawitir theih niin Quarantine Facility-a midangte himna tibuai zawnga inkaihhruaina leh thupek zawmlo te chu Rs. 500/- chawitir tur a ni a, COVID-19 avanga Central sawrkar emaw, State sawrkar emaw dan siam engpawh zawmlo chu Rs. 1000/- chawitir tur niin thuneitute phalna tel lova COVID-19 hri vei emaw, vei tura rinhlelhawm te chanchin emaw, an thlalak emaw Social Media leh Electronic Media-a tarlan chu Thla thum (3) Jail tan emaw, Rs. 3000/- chawitir emaw, a pahnih in emaw hrem theih an ni bawk ang.

Comments

Chhiar Hlawhte