Chanchin thar thenkhat :

 Sulhnu mobile app siam

Disaster Management & Rehabilitation Department chuan COVID-19 hri leng mekah sulhnu chhui awlsam zawkna atan 'Sulhnu mobile app' a siam thar. Hemi chungchanga sawrkar thu-chhuah siam in a tarlan dan chuan nitin COVID-19 hri kai kan pun chhoh tak zel avangin Contact Tracing uluk leh felfai taka kalpui a ngai ta takzet a. Contact tracing felfai leh dik taka kalpui a nih theih nan mipui vantlangin kan tlawh thin heng hmun - Dawr, Office, Bank, Chhiatni/thatni puipunna, Biak In leh a dang te ah hian kalkhawm leh tlawhtute uluk taka chhinchhiahna siam sawrkar chuan tha a ti a. Chuvangin, Sawrkar chuan 'Sulhnu mobile app' hi lehkhabu-a chhin-chhiahna (manual recording) thlakna atan hman tha tiin heng hmunah te hian 'sulhnu mobile app' hmanga QR code siamin, a tlawhtute felfai taka chhinchhiah nan ruahmanna an siam ngei ngei tur a ni, a ti a. Mi zawng zawngin he mobile app hmang hian an kalna hmunah te QR scan-in an in register vek bawk tur a ni tih a tarlang bawk.

COVID-19 Medical Operational Team thutkhawm nei

COVID-19 Medical Operational Team chu nimin khan an Chairman, Dr. ZR. Thiamsanga MLA hovin a Pisa-ah an thukhawm a, Mizoram chhunga COVID-19 darh zel dan leh kan din-hmun te an thlirho. Thutkhawm kaihruaitu Dr. ZR. Thiamsanga chuan hripui leng mek CO-VID-19 in kan rinphak baka nasa a mipui vantlang zinga min luh khung tak avanga tan kan lak nasat zual sauh sauh a ngaihthu sawiin, vaccine hman theih a awm hma thla tlem te la awmah hian kan dam tlan hram hram a tul thu te leh mipuite pawh tul tawpah lo chuan pawn chhuak lo-a mahni In lama tawm hram hram tura a duhthu a sawi a ni. He thutkhawm ah hian COVID-19 Discharge Protocol te, Quarantine Period, Contact tracing leh Testing chungchang te uluk takin an sawiho a, tun aia tha lehzual a heng hi kalpui anih theih nan sawrkar-ah rawtna thlen nise an ti bawk.

Eirukna a fihlim turin chah

Chief Minister, Zoramthanga chuan mipuite chu rinawmna leh dikna vawng a, eirukna laka fihlim turin a chah. Nimin (Oct. 27, 2020) atanga Nov. 2, 2020 thlenga hman tur ‘Vigilance Awareness Week’ puala thuchah a siamah Chief Minister chuan Central Vigilance Commission hmalakna hnuaiah thupui thlanbik neiin Vigilance Awareness Week hi hman thin a nih thu a sawi a, kumin thupui atan ‘Vigilance India, Prosperous India’ tih a nih thu a sawi. Chief Minister chuan kawng tinrengah hlemhlet duhna rilru neiloh leh rinawmna a pawimawh thu sawiin, hmasawnna bulpui pawh a nih thu a sawi bawk.

LADC-a MDC 12 te insawifiah turin hriattir an ni

Lai Autonomous District Council (LADC)-a Deputy Chairman, LR. Dingliana Chinzah chuan LADC-a Congress MDC pali, tunhnai a MNF Party zawmta te leh Congress MDC dang pariat, tunhnaia LADC a Congress Legislature Party atanga BJP Legislature Party dintute chu ban an nih lohna tur chhan ni 15 chhunga insawifiah turin nimin khan a hriattir a, LADC dan dinglai, ‘Nomination an File laia Sponsor tu Party atanga anmahni duhthu a Party dang zawmte chu MDC an nihna hlihsak tur’ tih LADC Constitution Conduct of Business Rules a awm palzut-ah puh an ni.