Mizoram mamawh Oil leh Gas te Manipur atanga phur turin sawrkar in Motor a tirchhuak

Assam State chhungah Mizoram chak lakna kawngpui a danpin avangin Mizoram sawrkar chuan Manipur atanga Mizoram mamawh Gas leh tuialhthei phur turin nimin khan lirthei a thir tan a, heng lirthei te hi nimin khan Ch. Saprawnga Truck Terminal, Rangvamual atangin thlahliam an ni.

Heng lirthei thlahna puala inkhawm tawi neih ah Supply Minister, K. Lalrinliana chuan Mizoram mamawh chawk luhna kawngpui, Assam nena kan inrina ah buaina a awm fo avangin Mizoram Sawrkar chuan kawng dang dapin Manipur lamah Oil leh Gas phur tur Truck engemawzat tirh thlak a tum a ni, a ti a. An Department leh Home Department-te chuan eirawngbawlna Gas leh Oil bakah buhfai leh thildangte pawh Assam paltlang lova phur theih a ni tih lantir a tul nia an hriat avangin Manipur lamah Oil leh Gas te phur tan an tum thu sawiin, Mizoram leh Manipur sawrkar inbiain, kalkawng a him em tih thlenga enfiah vek a nih hnuah leh, Oil petu ber IOCL hotute nena sawihoin ruahmanna an siampui tih a sawi a. Tun tumah hian ruahmanna an siam fel hnuah Mizoram Tanker Drivers’ Association lamin ro hran an rel avangin Truck kal tura beisei zat tun dinhmunah an kal thei ta rihlo tih a sawi a. Driver te hi inkohkhawm leh mek a ni a, Supply Department chuan ruahmanna siampuiin a tahtawlin an la kal zel dawn niin Minister chuan a sawi bawk.

Ruahman lawk ang chuan Manipur atanga Oil leh Tuialhthei phur turte hian Ngopa tlangdung atangin Manipur-a Oil leh Tuialhthei hi an han phur dawn a, a tirah Oil phur tur Truck 10 leh Gas phur tur Truck 5 tirh tum ni mah se Assam lama la thangkhang Mizo Tanker Driver te himdam taka Mizoram an rawn thlen hmaloh chuan lirthei chhuah phallo an awm avang hian ruahman ang zat hi tirhchhuah theih a ni ta lo a ni.

Nizan hmasa a Mizoram leh Assam Chief Secretary te inbiakna ah lirthei dante inkaltlang tir tawn tura an tih angin hemi zan la la hian Mizoram-a tangkhang Truck 200 chuang chu chhuah an ni tawh a. Amaherawh chu, Assam nena inrina laia buaina awm thin leh anni dan chah theih anga Mizote an ngai reng mai a dikloh thu leh, Mizo te chu dan chah theih an ni lo tih lantir an duh tih Minister chuan a sawi bawk.

Zawhna chhangin Supply Minister chuan, Manipur-a supply laknaah hian venhimna thilah harsatna awm lo turah an ngai tih a sawi a. Myanmar nena ramri-a insumdawn tawnna a neih mekah Oil leh Gas a tel lo a, Buhfai leh thildang erawh a tel tih sawiin, Myanmar lam hian insumdawn tawn an chak em em zawk a, Oil leh Gas ah erawh sawrkar laipui hotute phalna nena tih ngai a ni a, chutihrualin mangan chuan thil theih loh tur a awm chuang lo, a ti bawk.

Manipur-a LPG leh Oil lak tur hi Sekmai Bottling Plant ami leh Malom Oil Depot ami a ni dawn a. A kawng thui zawng tur hi kal lam leh haw lamah tlangram chinah KM 750 vel niin Phaizawl laiah KM 164, a vaiin KM 914 vel a ni.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn