MPCC in pawi tih thu an sawi

Mizoram Pradesh Congress Committee (MPCC) chuan Mizoram sawrkarin COVID-19 hrileng a do danah politics a hlawkna tel tuma thusawi leh hmalakna tam tak a awm thin avanga mipui tawrhna thleng mek chu pawi an tih thu an sawi.

Nimin a thuchhuah an siamah MPCC chuan Mizoram sawrkarin eptu party-te leh mithiamte rawtna ngai pawimawh lova Village Council leh Local Council inthlan a buatsaih luih avangin tualchhung-ah COVID-19 hri inkaidarhna nasa tak thlengin mi 100 chuangin hri hi an inkaidarh niin an sawi a ni.

MPCC thuchhuah chuan COVID-19 hri dona atan mimal thahnemngai tam tak, Kohhran, pawl leh MLA te’n CM Relief Fund for COVID-19 a sum leh pai an thawh chu a hmanna tur awm taka hmang tura mipuiin an ngaih laiin sawrkar sumbawm atanga lei tura ngaih hmanraw engemaw zat TrueNat khawl leh RAT Test Kit lei nan te sawrkarin a hmang nia sawiin, hetihlai hian State sawrkar Budget hmangin hmanhmawh thlaka ngaih loh hna nuai tam tak man party worker te a thawh tir reng thung tih an sawi bawk.

Hei bakah hian Oct. 4, 2020 khan Health Minister chuan thuchhuah siamin, COVID-19 hri inkaichhawnna (Transmission Chain) chhut chah a nih tawh thu min hrilh avangin mipuite kan zalen phah tih MPCC thuchhuah chuan tar-langin, tunhnaiah COVID-19 vei hmuhchhuah nasa takin a pun thu leh Oct. 4 atanga Oct. 30 chhungin hri kai mi 574 hmuhchhuah thar an ni tih an sawi a. MNF sawrkar in COVID-19 hi Politics khelhna hmanrua ah a hmang nia sawiin, RT-PCR dahna tur Laboratory din chungchang thlengin thu dik tawk lo mipui hrilhin, fak a hlawh theihna tur zawngin hma a la tih an sawi a. Sawrkar leh Health Minister chu an party hamthatna aiin mipui hriselna dinhmun tak tak hi ngaihtuah tawh zawk turin an chah bawk.