Latest News

MZP hruaitu ten ramri buaina kaihhnawih sawipui

MZP General Hqrs. hruaitute chuan nimin khan Chief Minister, Zoramthanga chu a Pisa-ah hmuin tunhnaia ramri-a buaina thleng kaih-hnawih leh hmalak zel dan tur chungchang an sawipui.

Nimin-a Chief Minister an hmuhna ah hian MZP General Hqrs. hruaitute chuan Saihapui ‘V’ khua in COVID-19 ven buk an sak tun thla ni 17-a Assam vai (Illegal migrants) leh Assam Police ten tichhiaa Assam Police ten an luah mek chu rang taka nawrchhuaka IR Police Camp nghet taka siam turin an ngen a, Chief Minister chuan MZP ngenna leh IR Camp chu siam a nih theih nana hmala tur leh a tul anga bawhzui a nih tur thu a lo hrilh a ni. Hei bakah hian MZP chuan Lailapur vai ten Vairengte leh Lailapur inkar-a Dawr an hawn, tunhnaia tihchhiat sak leh an nihna hmun chu Assam Vai in an lo luah leh hmaa IR Camp siam nghal tura ngenin an lo bawhzui tur thu leh ruahmanna an nei mek thu Chief Minister hian a sawi bawk.

Mizoram leh Assam buaina vanga Lailapur vai (illegal migrants) in Mizoram ei leh bar lakluhna ber kawngpui National Highway-54 an dangchat chu thalo an tih thu leh Mizo mipuite zahlohna ah an ngaih thu MZP chuan Chief Minister hnenah hian thlenin, Tripura, Manipur, Burma leh Bangladesh atanga ei leh bar lakluh dan ngaihtuah a ngaih thu leh a tul anga Mizoram Sawrkar pawh State danga zirlai pawl te nen tangruala hmalak dan tur leh, International Boundary piahlama Zohnahthlak unaute biakna kawngah an inhuam thu leh a inpeih thu an sawi a. Chief Minister chuan sawrkar in ngaihtuahna a sen mek thu leh MZP inhuamna chu fakawm a tih thu a sawi a. A tul anga hmalak ho nise a ti bawk.

Comments

Popular News (Last 30 Days)