Independent MLA te pawhin ramri an tlawh

Assam Forest Department hnathawktu ten an hal nia sawi Mamit District chhung Thinghlun khuaa John Zolawma huan chu Inrinni khan Independent MLA pathum- Vanlalhlana, Chhuanthanga leh Andrew H. Thangliana te chuan an tlawh.

Heng MLA pathum te hi Luimawi khuaah Mamit DC, Dr. Lalrozama nen intawngin, helai hmuna thil thlen dan hi Mamit DC hian a hrilhfiah a. ZLP MLA te chuan Assam lam hian John Zolawma Thlam an hal mai bakah huan thlai an suasam nasa hle niin an sawi a, Chhawhchhi quintal 2 thar ngei tura rin te, kuhva kung 600 te an suasam zingah hian a tel niin an sawi.

Hemi chungchanga ZPM thuchhuah chuan John Zolawma Thlam leh Thinghlun khaw inkara Mamit District MGNREGA lungphun pawh an tichhe bawk niin an sawi a, ‘Mizoram sawrkar hian Assam sawrkar thu an hnial ngam lo hle a ni,’ an ti a, Vanlalhlana, MLA chuan, “MNF sawrkarah Mizoram a him lo hle a ni,” a ti bawk.

Heng MLA pathum te hian John Zolawma tawrhpuina Rs. 2,000/- theuh an hlan nghal bawk.