Ramri chungchangah District 2 DC te an inkawm

Mamit District Bawrhsap, Dr. Lalrozama IAS kaihhruaina in nimin khan Mamit DC leh Karimganj DC, Anbamuthan MP te chuan Kanhmun BNRGSK Hall-ah Assam leh Mizoram inrina chungchang sawiin inkawmna an nei.

He inkawmna ah hian Mamit DC chuan tun thla ni 9-a Assam Karimganj District Official-te'n Thing-hlun khua-a John Zolawma Thlam an hal avang leh Ben David-a Kuhva huan an suasam avanga hetianga Meeting hi koh ngai ta anih thu a sawi a. Hetiang thil duhawm lo thleng avang hian State pahnihte inkar a chhiat phah theih avangin thil thleng chu pawi a tih thu a sawi a. Thinghlun khua-a thil duhawmlo thlentirtute chu manchhuak a, action la ngei tura a phut thu sawiin, thil thlenna hmun hi hmanlai kan pi leh pu te atanga mahni ta anga kan lo cheibawl thin, huan lo ram thlenga kan neih thinna anih avangin hun lokal zel turah pawh a hma anga neih chhunzawm reng theih an inbeisei thu a sawi bawk.

Karimganj DC, Anbamuthan MP chuan thil duhawmlo thleng chu pawi a tih thu sawiin, chutihrualin thil thlenna hmun chu Singla Forest Reserve hnuai a awm, Karimganj District chhung ami anih avangin an thuneihna zahsak turin Mizo-ram lam Officials-te chu a ngen thung a ni.

He thutkhawm a tel District Bawrhsap pahnih te hian ramri chungchang tifel turin anmahni State Sawrkar thuneitu sang hnenah thlen a, chinfel thuai nise tiin buaina thlenna hmunah hian dan leh thupek kenkawh a awlsam zawkna tur leh boruak sosang veng turin a tul anga Police Duty hmun siam nise tih an tih bakah Sawrkar pahnih te'n ramri buaina chinfel anih thuai theihna tur leh remna leh muanna a awm theih nan thawh-dun dan an zawng tur a ni, an ti bawk. He inbiakna ah hian sawrkar Official thahnem tak an tel bawk a ni.

Comments

Chhiar Hlawhte