Thalaite zinga entrepreneurship tihhmasawnna tura hmalakna thar siam belh chungchang sawiho a ni

Nimin khan Chief Minister, Zoramthanga hovin Mizo thalaite zinga mahni kutkawih eizawnna, Entrepreneurship lama hma an sawn theih nan hmalakna thar siam belh chungchang sawihona neih niin Mizo thalaite zinga mahni kutkawih, mahni hmangchang hriatna hmanga eizawnna nei thei tura thalaite dinhmun zirchianna chu thlirho a ni bawk.

Chief Minister Office Conference Hall-a he sawihona hunah hian MEDMOC leh Mizoram University Incubation Centre tangkawpin Mizo thalaite zinga mahni kutkawih, mahni hmangchang hriatna hmanga eizawnna nei thei tura thalaite dinhmun zirchianna ‘Mapping General Enterprising Tendency among Mizo youth’ tih chu thlirho niin Chief Minister, Zoramthanga chuan eizawnna ah sawrkar hna ngawt chuan kan thalaite a tlin tawh dawn loh thu leh, Entrepreneurship tihhmasawn chu thil pawimawh tak a nih thu a sawi a. Hemi atan hian zirchianna atanga a lan dan angin, zirlai naupang an nih lai atanga a remchan dan anga Syllabus ah telh te, Training pek thu hlaah pawh awmze nei taka an kum mil zela zirtirna duan te, puitling zingah chuan hman nghal mai theih tur inzirtirna pek a pawimawh thu te a sawi bawk.

School Education Minister, Lalchhandama Ralte chuan MEDMOC leh MZU Incubation Centre te zirchianna chu tha a tih thu sawiin, ‘Entrepreneur hlawhtling tak an ni ngei ngei dawn e’ tih nemnghehna a la nih loh avangin kan Mizo thalaite zinga theihna leh thiamna awm hi kaihhruai a, belhchhah sak chu pawimawh a tih thu a sawi a. Zirlaite syllabus a Entrepreneurship Development telh chu a tangkai tur thu a sawi a. Chutihrual chuan School Syllabus hi a hma kum a lo duan lawk zel thin a nih avangin ruahmanna felfai tak siam lawk hmasak a tul thu a sawi bawk.

‘Mapping General Enterprising Tendency among Mizo youth’ ah hian Mizoram hmun hrang hranga Higher Secondary School leh College zirlai random a thlan mi 2255-ah zawhna siam a ni a. Tehfung atan mi hlawhtling ten ze inanga an neiha an sawi thin panga (5) hman a ni a; chungte chu Need for Achievement (thil tih hlawhtlin duh avanga nawrtu awm), Need for Autonomy (Mahni ngei a thil tih duhna), Creative Tendency (a nachang hriatna, ngaihtuahna themthiamna), Calculated Risk Taking (risk lak thiam) leh Drive and Determination (anmahni nawr kaltu leh tumruhna) te a ni a. Score hi 30.37 niin, hei hi ram dang nen khaikhin chuan vantlang tak a ni tih he hunah hian tarlan a ni bawk.