Tui pawimawh zia hriat theihna tur lehkhabu, 'Tui Ramvachal (The Water Heroes)' tlangzarh a ni

PHE Serchhip WATSAN Division-a Sr. Executive Engineer, Er. F. Lalsanglura lehkhabu ziak, 'Tui Ramvachal (The Water Heroes)' chu nimin khan MJA Serchhip District President, Kapliana Pachuau chuan a tlangzarh.

Lehkhabu tlangzarhna inkhawm, PHE Serchhip WATSAN Division Office tual-a neih hi Er. Samuel LR Ralte, Sr. SDO chuan kaihruaiin, lehkhabu tlangzarhtu MJA Serchhip District President, Kapliana Pachuau chuan Er. F. Lalsanglura'n a eizawnna a nih piah lama rawngbawlnaa ngaia lehkhabu hlu tak a ziak chu lawmawm a tih thu a sawi a, Tui chu kan nunna-in a mamawh a nih avangin damchhungin ngaihthah theih a ni dawn lo tih sawiin, Tui hi a hlut avangin khawvel hmun hrang hrangah pawh Tui inchuhna a nasa tih a sawi a, Tui mamawhna avanga khawvel ram tam takte an buai luai luai laiin keini Mizoram hi chu kan vannei a, kumtin a hun takah Fur ruahtui kan dawng a, mahse a dawn thlêng kan neih thatloh avang te, chinchang kan hriat loh vang te, kan inthlahdah vangte in hman tangkai lohin tuifinriat lamah an luang liam nguah nguah reng a, Tui tel lova kan nun theih miau si loh avangin sawrkarin sum tam tak tak sengin Tui in tur min pe leh a, chutiang karah chuan mipuiin Tui hlutzia kan hriat thar lehna tura PHE Serchhip WATSAN Division-a Sr. EE, Er. F. Lalsanglura’n 'Tui Ramvachal (The Water Heroes)' lehkhabu a ziah chu Serchhip District chhunga PHE WATSAN Committee zawng zawng leh a chhiar apiang ten tangkai taka an hman turin a tlangzarh ta tih a sawi.

Lehkhabu tlangzarhna inkhawmah hian lehkhabu ziaktu, Er. F. Lalsanglura chuan a lehkhabu sawi zauna hun hmangin, he lehkhabu a buatsaih chhan chu mipuiten Tui lâkna man a to zia an hriat a, Tui hlutna an hriat thar lehna atan te, Tui hna vênhim leh tihpun a tulna leh, chumi atana hmalak dan turte mipuiin an hriat theihna tur te a nih thu a sawi a, ramngaw leh boruak vênhim a tulzia te, ruahtui tla te In lam leh ram lama khâwl a tulzia leh a khawl khawm dan tur mipuiten an hriat theihna tur te, tui hna a kiam mek ruala mihringten Tui kan mamawh tam telh telh avanga Tui indaihlohna a nasat chhoh mek zel dante mipuiten an hriat theihna tur a nih beiseiin he lehkhabu hi a buatsaih tih a sawi a, he lehkhabu hi tui venhim leh humhalh hna thawktu, 'Tui Ramvachal' ni tura miten an rilru an siam theih phah a beisei thu a sawi bawk.

Lehkhabu tlangzarhna inkhawmah hian Saitawni chuan hunserh hmangin, Er. F.Lalsanglura hian PHE Serchhip WATSAN Division hnuaia Sub-Division pathum-a Field Staff-ten an hnathawhnaa an hman atana siam Nihliap lian chu tlangzarh ve nghalin, Sub-Division pathum - E.Lungdar, Serchhip leh Tlungvel Sub-Division-te chu nihliap 10 theuh a sem nghal a ni.