Latest News

AMC area-ah hri kai pung zel

Niminpiah a Mizoram-a Sample enfiah atangin COVID-19 hri kai mi 49 zet hmuh belh leh an ni a, heng zinga mi 43 te chu Aizawl khawpui chhung Veng hrang hranga hri kai hmuh te an ni.

Niminpiah khan ZMC Laboratory-ah Sample 811 enfiah niin heng atang hian COVID-19 hri kai mi 36 hmuh an ni a, heng te hi Aizawl District-a Sample lak te vek niin AMC huamchhung Veng 10 atanga hri kai hmuhchhuah an ni a, Ramthar Veng-ah hri kai mi 14 zet hmuh niin Zemabawk North-ah hri kai mi 7 hmuh a ni bawk a, Zarkawt-ah hri kai 4 hmuh niin Ramthar North-ah hri kai 3 hmuh an ni bawk a, Zemabawk Galilee Veng leh Edenthar-ah hri kai 2 ve ve hmuh niin a bak veng dang 4-ah hri kai pakhat theuh hmuh an ni bawk. Aizawl District-ah hian Rapid Antigen Test hmangin hri kai mi 7 hmuh niin Aizawl khawpui Veng 7 ami an ni bawk.

Aizawl pawn lamah niminpiah khan TrueNat Laboratory atangin hri kai mi 2 hmuh niin Serchhip Prem Kram Company hnuaia thawk State pawn atanga rawn kal pakhat chu hri a kai tih hmuh niin Lunglei District-ah hri kai nen inkawmhnaih atanga hri kaichhawng pakhat hmuh a ni bawk. Niminpiah vek khan Rapid Antigen Test hmangin Lawngtlai District-ah hri kai mi 4 hmuh an ni bawk a, Longpuighat leh Chawngte 'P' atanga hri kai hmuhchhuah te chu Don Bosco School, Lawngtlai-a zirlai niin Blue Mountain School, Lawngtlai-a zirlai, Sangau-II ami pawhin hri a kai tih hmuh a ni a, Lawngtlai Vengpui-ah tualchhung a hri inkaichhawng pakhat hmuh a ni bawk.

Nimin khan Mizoram-a COVID-19 hri kai mi 18 te chu enkawl dam leh niin tun thlengin Mizoram a hri kai hmuhchhuah chu 2656 an ni tawh a, an zinga mi 2256 te chu enkawl dam an ni tawhin, hri kai enkawllai mi 399 leh nunna chan mi pakhat an awm tawh bawk a ni.

India-ah hri kai enkawl dam an pung zel :

India rama COVID-19 hri kai hmuhchhuah atangin zaa 90.99 te chu enkawl dam an ni tawh a, hri kai hmuhchhuah atanga zaa 7.51 te chu enkawl mek an ni. Ministry of Health & Family Welfare chhinchhiahna atanga a lan danin darkar 24 kalta chhung khan India ramah COVID-19 hri kai mi 56,480 te chu enkawl dam leh niin tun thlengin India rama hri kai hmuhchhuah atangin 73,15,989 te chu enkawl dam an ni ta a, hei hi hri kai hmuh tawh zawng zawng 80,40,203 atangin zaa 90.99 niin India chu khawvel ram hrang hrang zinga hri kai enkawl dam kawngah hmasawn chak ber niin Health Ministry chuan a hun taka enkawlna pek a nih avang leh a hmatawng-a thawktute inpekna vang a nih thu a sawi a ni.

Tunah hian India ramagh hri kai enkawllai 6,03,687 an la awm mek a, hei hi hri kai hmuhchhuah atangin zaa 7.51 niin, darkar 24 kalta chhung khan India ramah hri kai hmuhchhuah thar 49,881 an awm a ni. India ram-a COVID-19 hri kai hmuh tawh zingah nunna chan 517 an awm belh leh avangin tun thlenga nunna chan chu mi 1,20,527 an tling tawh a, hei hi hri kai hmuhchhuah atangin zaa 1.50 a ni bawk.

Comments

Popular News (Last 30 Days)