Mizo Regiment/Rifles din tura ngenna thlen

Mizoram Rajya Sabha MP, K. Vanlalvena chuan niminpiah tlai khan Union Defence Minister, Rajnath Singh chu New Delhi-a a chenna In-ah hmuin Defence Ministry hnuaiah emaw, Home Ministry hnuaiah emaw Mizo Regiment emaw, Mizo Rifles emaw din turin a ngen.

Rajya Sabha MP hian Defence Minister hnenah hian Mizote chu pi leh pu hunlai atang tawha Hnam huaisen leh indo mi kan ni tih sawiin, British sawrkar in India, Bangladesh leh Pakistan te awp tur chuan silai vawi khat pawh a hmeh puah loh laiin Mizote awp tur erawh chuan British sipai leh Officer ten nunna an chan a. Hun rei tak chhung Mizo leh Bristish te chu indovin Mizo lal pahnih, Dokulha Chinzah leh Ropuiliani te phei chu an thih ni thlengin British hovin Lung In-ah an khung tih a sawi a. Mizo tlangval tam tak ten Sipai tan chu an duh ber a nih avangin Assam Regiment leh Assam Rifles-ah pawh Mizo tlangval tam tak an tang mek tih sawiin, tuna tang mek aia tam zawk daih hi sipai-a tang duh Mizo thalai an awm thu leh, Police sang khat vel lak turah pawh Mizo tlangval sing li chuang an intlar tih a sawi bawk.

Rajya Sabha MP chuan Mizo Regiment emaw, Mizo Rifles emaw din a nih chuan India in Regiment a neih tawh zawng zawnga huaisen leh discipline tha ber an nih theih a rin thu te, International boundary KM 720-a thui in min hual vel avangin Mizo Regiment emaw, Mizo Rifles emaw din chu a tul thu leh hei hi Mizo thalaite eizawnna atan chauh ni lovin India ram himna atana thil pawimawh tak a nih thu a sawi bawk a. Mizo Rifles emaw Regiment emaw din theih a nih chuan an Hqrs. thuthmun leh Training Centre atan Mizoram chhunga Assam ramri ah Inner Line Forest Reserved zau tak an neih thu leh hei hi tih hlawhtlin a nih chuan Mizoram sawrkar tan Revenue hnar tha tak a nih tur a thu pawh a thlen bawk.

Union Defence Minister hian Rajya Sabha MP, K. Vanlalvena thu thlen chu thil pawimawh tak a nih thu lo sawiin, uluk taka ngaihtuahna hmang chungin an lo enzui dawn tih a hrilh a ni.