Serchhip-ah hri kaichhawnna hriatloh atangin COVID-19 hri kai mi 2 hmuhchhuah an ni

Nimin khan Serchhip-ah COVID-19 hri kai mi pahnih hmuhchhuah niin an pahnih hian hri an kaina hriat a ni lo ve ve a, hei vang hian nimin atang khan Veng thenkhat ah chuan inkharkhipna puan nghal niin hri kai ten an lo kawm hnaih te chhui hna pawh ngawrh taka thawh nghal a ni.

Serchhip CMO Office atanga thu kan dawn danin nimin a Serchhip-a hri kai hmuhchhuah te hi mipa leh hmeichhia te niin Serchhip Chanmari Veng leh P&E Veng ami te an ni a, anmahni taksa-a insawiselna an neih avanga thawktute an biak hnuah nimin khan Rapid Antigen Test hmanga an Sample enfiah a ni a, hetah hian hri an kai tih hmuhchhuah an ni a, amaherawh chu an hriselna dinhmun erawh a that thu leh ngaihtuahawm an nih loh thu an sawi bawk.

Heti hian nimin thleng khan Serchhip District-a COVID-19 hri kai hmuhchhuah chu mi 68 an ni ta a, an zinga mi 63 te chu enkawl dam ni tawhin tunah hian hri kai enkawllai mi 5 an awm mek a, an vai hian Chhiahtlang Tourist Lodge CCC-a enkawllai vek an ni.

Hetianga COVID-19 hri kai hmuhchhuah an nih avang hian Serchhip Veng thenkhat ah chuan nimin atang khan inkharkhipna puan nghal a ni a, Serchhip Chanmari Village Level Task Force (VLTF) Chairman, C. Lalremliana hnen atanga thu kan dawn danin nimin-a an huamchhunga-a COVID-19 hri kai hmuhchhuah hi Auto Rickshaw Driver niin kar hmasa khan a nau chuan a pasal a nei bawk a, hei vang hian tun thla ni 4 hnu lama a Auto Rickshaw (Mawi Mawi)-a lo chuang te leh kar hmasa a nau pasal nei tur thlahna a kal te reng reng chu VLTF hruaitute hnena in report tura tih niin heng mite hi Health Department te nen a tul anga Sample enfiah tura tih an nih thu a sawi bawk. Serchhip Chanmari VLTF Chairman chuan hetianga an huamchhunga COVID-19 hri kai hmuhchhuah an nih avang hian an huamchhungah District thuneitute hriatpuina a Total Lockdown (Veng pum inkharkhip) puan nghal a nih thu leh an veng mipuite chu Veng pawn lama chhuah khap a nih bakah an Vengchhunga dawr te pawh khar nghal an nih thu a sawi a, an huamchhunga sawrkar Pisa te pawh khar lailawk tura tih a ni tih a sawi bawk.

Nimin vek khan Serchhip P&E Veng-ah COVID-19 hri kai pakhat hmuhchhuah niin amah hi hmeichhia niin Excise & Narcotics Department-a thawk a ni a, hemi chungchangah hian Serchhip P&E Veng VLTF Chairman, C. Vanlalsiamthara chuan an vengchhung ah nimin atang khan Total Lockdown puang tura an thlen thu leh he thu buatsaih lai thleng hian chhanna an la dawnloh thu a sawi a, amaherawh chu mipuite chu pawn-a chhuak lo tura hriattir an nih bakah dawr te pawh hawn khap a nih thu sawiin, Lockdown hi puan a nih chuan sawrkar Pisa te pawh khar a nih dawn thu a sawi a, hri kai in a lo kawmhnaih te pawh a theih anga chhui zuiin VLTF hruaitute hnena in hriattir tura tih an nih thu a sawi a. Health Department lama thuneitute nen Sample enfiah chhunzawm dan tur pawh ruahman a nih thu a sawi bawk.

Hetianga VC Area pahnih-a inkhar-khip puan a nih bakah hian Serchhip-IV VLTF te chuan hri kai te nena lo inkawmhnai chhui-chhuah an nih theihna turin nimin khan an huam-chhung ah Total Lockdown puangin Serchhip Bazar-a Dawr leh sumdawnna hmun te pawh khar nghal a ni bawk a. Serchhip-IV VLTF Chairman, V. Tlangthuama chuan nimin-a hri kai an hmuhchhuah pakhat hi an huamchhunga che tla thin a nih avang leh tunhnaiah an huamchhung ami nen lo inkawmhnai an tam nia hriat a nih avanga Total Lockdown hi kalpui an nih thu a sawi a, harsatna dang a awm a nih loh chuan nizan zanlai thleng kha an Total Lockdown in a huam dawn thu a sawi bawk.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn