Mizoram-ah 93.72% enkawl dam an ni tawh

Nimin khan Mizoram-ah COVID-19 hri kai mi 37 enkawl dam leh niin Mizoram-a hri kai enkawl dam zawng zawng chu zaa 93.72 an tling ta.

Sawrkar thuchhuah tarlan danin nimin a hri kai enkawl dam zinga mi 35 te hi Lunglei District mi niin midang pahnih hi Aizawl District mi a ni thung a, heti hian nimin thleng khan Mizoram-a COVID-19 hri kai hmuhchhuah zawng zawng chu 2184 niin mi 2047 te enkawl dam an ni tawh a, hri kai enkawllai 137 awmin hri kai enkawl dam hi hri kai hmuhchhuah atangin zaa 93.73 an tling tawh a ni.

Niminpiah-a Mizoram-a Sample enfiah zingah COVID-19 hri kai mi 9 hmuh thar an awm leh a, niminpiah khan ZMC Laboratory leh District hrang hranga TrueNat Laboratory-ah Sample enfiah awm lovin Rapid Antigen Test hmangin Sample 852 enfiah a ni a, heng atang hian COVID-19 hri kai mi 9 hmuhchhuah niin Aizawl Dawrpui Veng mi 7 leh Tuikual North mi 2 te an ni. Aizawl Dawrpui Veng-a hri kai hmuhchhuah zinga 2 te hi hri kai hmuhchhuah tawh te nen inkawm hnaih atanga hri kai niin midang 5 te hi hri an kaina hriatloh an ni thung a, an zinga mi 3 te hi an taksa a hri kai lanchhuahna nei niin midang 4 te hi hri kai lanchhuahna neilo an ni bawk. Niminpiah a Tuikual North-a hri kai hmuhchhuah mi pahnih te hi taksa-a natna lanchhuahna nei ve ve niin hri kai nen inkawmhnaih atanga hri kai an ni bawk.

India ram-ah hri kai enkawl dam an pung zel :

India rama COVID-19 hri kai hmuhchhuah atangin za zela 86.36 te chu enkawl dam ni tawhin hri kai enkawllai pawh an tlem hret hret zel. Ministry of Health & Family Welfare chhinchhiahna atanga a lan danin darkar 24 kalta chhung khan India ramah COVID-19 hri kai mi 71,559 te chu enkawl dam leh niin heti hian India rama hri kai hmuhchhuah zingah 61,49,535 te chu enkawl dam an ni tawh a, hei hi hri kai hmuh tawh atanga chhutin za zela 86.36 an ni.

Darkar 24 kalta chhung khan Sample 9,94,851 enfiah leh niin heng atang hian hri kai hmuhchhuah thar 66,732 an awm a, heng te nen hian India rama Sample enfiah zawng zawng chu 8,78,72,093 niin hri kai hmuhchhuah zawng zawng pawh 71,20,538 an tling tawh a, mi 61,49,535 enkawl damin tunah hian hri kai enkawllai 8,61,853 an la awm a, hei hi hri kai hmuhchhuah atangin zaa 12.10 niin hri kai zingah nunna chan 1,09,150 an awm tawh bawk a, nunna chan hi hri kai hmuhchhuah atangin zaa 1.53 a ni bawk.