Mizoram-ah COVID-19 hri kai 20 hmuh belh an ni

Niminpiah-a Mizoram-a Sample enfiah zingah COVID-19 hri kai hmuhchhuah mi 20 an awm leh a, tun thlenga hri kai hmuhchhuah chu mi 2148 an tling tawh.

Niminpiah khan ZMC Laboratory-ah Swab Sample 140 enfiah niin heng atang hian hri kai mi 3 hmuh an ni a, heng mite hi Chanmari West mi 2 leh Zemabawk mi pakhat te niin Chanmari West mi State pawn atanga rawn haw an chhungte atanga hri kai nia hriat niin In lama inkhunghrang lai an ni a, Zemabawk-a hri kai hmuhchhuah hi Arunachal Pradesh atanga rawn haw leh khunghran lai a ni bawk.

District hrang hranga TrueNat Laboratory-ah Sample 74 enfiah niin heng atang hian hri kai mi 10 hmuh leh an ni bawk a, hri kai hmuh-chhuah tamna ber Lunglei District-ah Assam Rifles sipai hri kai mi 7 hmuh niin zinchhuahna neilo leh inkhunghrang lai an ni a. Serchhip, Lawngtlai leh Saitual District-ah hri kai pakhat theuh hmuh niin company hrang hrang hnuaia thawk leh State pawn atanga rawn lut an ni.

Niminpiah vek khan Rapid Antigen Test hmangin Mizoram-ah Sample 643 enfiah niin heng atang hian hri kai mi 7 hmuhchhuah an ni bawk a, an zinga mi 6 te chu Aizawl Dawrpui Veng-a Colony khata cheng te niin tunhnaia zinchhuahna neilo te an ni a, an zinga pakhat hi taksa-a natna lanchhuahna neih avanga enfiah leh hri kai tih hmuhchhuah niin midang zawng hi hri kai lanchhuahna neilo an ni a, an zingah hian kum 70 mi a tel bawk a ni.

Heti hian nimin thleng khan Mizoram-ah COVID-19 hri kai hmuhchhuah 2148 an tling ta a, an zinga mi 1895 te chu enkawl dam ni tawhin tunah hian hri kai enkawllai 253 an la awm mek a, hri kai hmuhchhuah atanga zaa 88.22 te chu enkawl dam an ni tawh a ni.

India ramah hri kai nuai 67 an tling tawh :

India rama COVID-19 hri kai hmuhchhuah chu nuai 67 an tling tawh a, hri kai enkawl dam pawh nuai 57 an tling tawh bawk. Ministry of Health & Family Welfare chhinchhiahna atanga a lan danin darkar 24 kalta chhung khan India ramah Sample 11,99,857 enfiah leh niin heng atang hian COVID-19 hri kai 72,049 hmuh thar leh an ni a, hetihlai hian darkar 24 kalta chhung khan hri kai 82,203 te chu enkawl dam an ni ve leh thung a, darkar 24 kalta chhung khan hri kai hmuhchhuah thar aiin enkawl dam hi 10,154 in an tam zawk a ni.

India ramah hian nimin thleng khan hri kai hmuhchhuah chu 67,57,131 tling tawhin mi 57,44,693 enkawl dam an ni tawh a, hei hi hri kai hmuhchhuah atangin zaa 85.01 niin tunah hian hri kai enkawllai  9,07,883 an la awm mek bawk. India ramah hian hri kai hmuhchhuah atanga nunna chan chu 1,04,555 an tling tawh bawk.