DCHC-ah khum 166 awm mek

Mizoram-ah COVID-19 hri kai enkawlna tur Dedicated Covid Health Centre (DCHC) khum 166 awmin COVID Care Centre (CCC) ah mi 2000 enkawl theihna tur a awm bawk.

Nimin a mipuite hnena thuchah a sawi ah Health Minister, Dr. R. Lalthangliana chuan Mizoram a COVID-19 hri kai te enkawlna tura ruahmanna an neih dan sawiin, ZMC chu COVID-19 hri kai te enkawlna tur bik liau liau, State Dedicated COVID Hospital atan ruahman a nih thu leh COVID-19 hri kai ngaihtuahawm (serious) deuh enkawlna tura ruahman niin, tunah hian kan la indaih deuh avangin serious vaklo te pawh la in dah theih a nih thu a sawi a. Serious vak lo bakah mahni inringhlel te lo awm lailawkna turin District tinah Dedicated Covid Health Centre ruahman niin a tul chuan heng hmunah te hian Oxygen pek mai theih a nih thu leh hetiang hi Mizoram-ah 14 awmin khum 166 a awm thu a sawi a, DCHC hi Aizawl-ah 5 awmin Mamit District-ah 2 leh Champhai, Khawzawl, Kolasib, Lawngtlai, Lung-lei, Serchhip leh Siaha-ah pakhat theuh a awm thu a sawi a ni.

Health Minister chuan Ventilator pawh tun dinhmunah chuan kan ngah viau tih sawiin, thlaphanna tur awmin a lang lo tih a sawi a. Donation angin Ventilator 129 zet kan dawn thu leh Sawrkarin a neih sa 70 a awm bawk tih sawiin, “Kan thawhpui Private Hospital zawng zawngah Ventilator hi pek tumin ruahmanna kan kalpui mek bawk a ni,” a ti.

Heng bakah hian COVID Care Centre (CCC) pawh District tinah kan neih thu Health Minister chuan sawiin, heng CCC te hi mi 2000 enkawl theihna tur a nih thu a sawi a. COVID-19 vei zingah naupang leh nausen kan neih tak nual avangin naupang leh nausen te enkawlna tur bik Chid-Friendly Covid Care Centre siam turin hmalak mek a nih thu a sawi bawk.