AMC inthlan hun tur hriat theih ala ni rihlo

State Election Commission (SEC) chuan Aizawl Municipal Corporation (AMC) inthlanna neih hun tur hriat theih ala nih loh thu an sawi.

State Election Commissioner, Laima Chozah chuan AMC inthlan hun tak chu a la hriat theih rih lo tih leh sawrkar atangin inthlan rawtna a la dawng lo tih sawiin, “Tunlai hian Roll Revision kan buaipui mek a. COVID-19 hi vantlang-ah a darh mek niin a lang a, Village Council leh Local Council kan inthlang tawh a, inthlan vanga hri kai an awmin nuam kan ti lo a, hemi avang hian boruak kan thlir reng a ni, kan dinhmun ngaichang chungin sawrkar nen kan inrawn hnuah chauh thutlukna kan siam thei ang,” a ti. 

AMC Term chu pawhsei theih a nih leh nih loh zawhna chhangin SEC Commissioner chuan, “Sawrkar thu thu a ni a, a duh chuan a pawtsei thei a ni,” a ti a. AMC inthlan atan hian MLA Electoral Roll chu Mother Roll-ah an hmang dawn niin a sawi bawk.

Tuna AMC hi November 26, 2015 khan thlan a ni a, an term hi December 10, 2020 khian a tawp dawn nia thudawn a ni a. Kum 2015 inthlanah khan MNF chuan seat awm 19 zinga seat 11 an la a, Congress leh MPC tangrualin seat 8 lain ZNP leh BJP ten seat lak an nei lo thung. AMC-ah hian hmeichhiate tan seat 6 hauh (reserve) a ni a, inthlan hnuhnung berah khan Reserve Seat 6 zinga 5 hi Congress-MPC ten an la a, MNF-in seat 1 an la thung.

AMC inthlanna neih tur atan hian Political Party hrang hrangte chuan an inpeih tawh thu sawiin, inthlanna hi kil li (4) anga chuh a ni dawn niin a lang a, MNF General Secretary, T. Liansiama chuan, “AMC inthlanah hian kan rawn thawhpui ang che u ti an awm chuan hnar thu a awm lo a, chutiang a nih lem loh chuan a mala chuh kan tum a. Candidate tur kan la tifel chiah lo a, seat zawng zawng chuh kan tum a ni,” a ti a. Hetihlai hian MPCC Media Cell Chairman, Dr. Lallianchhunga chuan Candidate tur pawh an tihfel tep tawh thu sawiin, “Thil thar a awm a nih loh chuan thawhpui nei lova a mala chuh turin thutlukna kan siam,” a ti.

ZPM Secretary General, PC. Vanlalruata pawhin an party chuan thawhpui neih an tum lo tih sawiin, “Kan candidate tur hi 100% chuan kan la tifel lo deuh a, Ward 2/1-ah kan la final lo,” tiin an inbuatsaihna a sawi a. People’s Conference (PC) Party Vice President, Lalrinzuala Chawngthu chuan inthlan chuh tumin hma an la chho tan tih sawiin, thawhpui an neih dawn leh dawnloh leh Ward an chuh dan tur ala hriat loh tih a sawi bawk. Party hrang hrangte hian a hun pangngaia inthlang tur hian an inpeih thu an sawi rualin, hri leng avanga inthlan hun sawn hret a tul pawhin mipui himna an ngaih pawimawh thu te an sawi hlawm a ni.