Mizoram-ah hri kai 58 zet hmuh belh leh an ni

Inrinni-a Mizoram-a Sample enfiah atangin COVID-19 hri kai mi 58 zet hmuhchhuah leh an ni a, Mizoram-a COVID-19 hri kai enkawllai pawh mi 249 zet an ni leh tawh.

Inrinni-a Mizoram-a COVID-19 hri kai hmuhchhuah zinga a tam ber te hi Aizawl District-a hri kai hmuh te an ni a, ZMC Laboratory-a Sample enfiah atangin COVID-19 hri kai mi 40 hmuh niin an vai hian Aizawl District-a Sample lak vek an ni a,  an zinga a tam zawk hi Aizawl khawpui Veng hrang hranga awm niin MYC Office-a hri kai hmuhchhuah tawh atang kaichhawng leh  St. Joseph's Higher Secondary School-a hri kai hmuhchhuah kaihhnawih a hri kai te an ni a, State pawn atanga rawn lut mi 8 an awm bawk.

Inrinni khan District hrang hrang TrueNAT Laboratory-ah Sample 143 enfiah niin heng atang hian COVID-19 hri kai hmuhchhuah thar 12 an awm bawk a, an zinga 11 te hi State pawn atanga rawn lut niin midang pakhat hi tualchhunga hri kai a ni thung a, Hnahthial District-ah mi 5, Serchhip leh Khawzawl District-ah mi pahnih ve ve leh Kolasib District-ah mi pathum te an ni.

Rapid Antigen Test hmangin Inrinni khan Sample 528 enfiah niin heng atang hian COVID-19 hri kai mi 6 hmuhchhuah thar an awm ve leh bawk a, an zinga mi 4 te hi Aizawl khawpui chhung Veng pathum ami te niin mi pahnih te hi hri an kaina hriat a ni lo thung a, midang pahnih te hi Kolasib District-a hri kai hmuhchhuah, State pawn atanga rawn lut ve ve an ni bawk.

Heti hian nimin thleng khan Mizoram-ah COVID-19 hri kai mi 2447 zet hmuhchhuah an ni ta a, an zinga mi 2202 te chu enkawl dam ni tawhin tunah hian hri kai enkawllai 245 an la awm mek a, nimin khan mi 4 te chu enkawl dam leh an ni.

India-ah hri kai zaa 90 enkawl dam an ni tawh :

India rama COVID-19 hri kai hmuhchhuah atangin zaa 90 te chu enkawl dam an ni tawh a, hri kai enkawllai chu zaa 8.50 an ni thung. India ramah hian darkar 24 kalta chhung khan COVID-19 hri kai mi 62,077 te chu enkawl dam leh niin heti hian nimin thlenga hri kai enkawl dam chu mi 70,78,123 an tling ta a, hei hi India rama hri kai hmuhchhuah tawh zawng zawng atangin zaa 90 an ni.

Darkar 24 kalta chhung khan India ramah hian COVID-19 hri kai hmuhchhuah thar 50,129 an awm a, heng te nen hian India rama hri kai hmuhchhuah chu 78,64,811 tling tawhin tunah hian hri kai enkawllai 6,68,154 an awm mek a, hei hi hri kai hmuhchhuah atangin zaa 8.50 a ni a, nimin thleng khan hri kai zingah nunna chan 1,18,534 awmin hei hi hri kai hmuhchhuah atangin zaa 1.51 a ni bawk.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn