Presbyterian in Missionary tirchhuak tam ber

Mizorama Kohhran hrang hrang zingah Presbyterian Church of India chuan Missionary an tirchhuak hnem ber.

Tunhnaia tihchhuah tak ‘Statistical abstract of Mizoram 2019’ tarlan danin Mizorama Kohhran 10 an chhinchhiah zingah PCI chuan Missionary tirchhuak hnem berin 1,708 an tirchhuak a, heng Missionary zinga 1,005 hi mipa an ni a, hmeichhia 703 an awm bawk. PCI dawtah hian Baptist Church of Mizoram (BCM) awmin Missionary 1,297 an tirchhuak a, Kohhran dangten an tirchhuah zat chu UPC (NEI) 140, UPC (Mz) 164, Salvation Army 302, Seventh-Day 3, Evangilical Church of Maraland (ECM) 330, Lairam Isua Krista Baptist Kohhran (LIKBK) 82 leh Isua Krista Kohhran (IKK) 22 te an ni.

Kohhran mipui (member)-ah pawh PCI tam berin member 6,12,804 an nei a, heng an member zinga 2,99,368 hi mipa niin hmeichhia 3,13,436 an awm bawk. BCM chu member tam lamah pahnihna niin 1,73,373 an awm a, UPC (NEI) chu pathumna niin member 90,216 an nei. Kohhran lian zuala member awm zat chu UPC (Mz) 67,981, Salvation Army 62,234, Seventh Day 16,988, Roman Catholic 24,130, ECM 45,335, LIKBK 28,868, IKK 11,283 te an ni.

Tlawmngai pawl (NGO) zingah Young Mizo Association (YMA) chuan member an ngah ber a, member 4,46,623 neiin Branch 803 an nei a. Mizo Hmeichhe Insuihkhawm Pawl (MHIP) chu pahnihna niin member 2,87,827 an nei a, Mizoram Upa Pawl (MUP) chu pathumna niin member 64,078 an nei a ni. Tlawmngai pawl dangten member an neih zat chu Young Chakma Association (YCA) 16,570, Young Lai Association (YLA) 56,700, Lai Women Association (LWA) 6,301, Mara Thyutlia Py (MTP) 12,200 leh Mara Chano Py (MCP) 6,700 te an ni bawk.

Comments

Chhiar Hlawhte