Mizoram-a Ramhmul damdawi siamna din turin ngen

Mizoram Rajya Sabha MP, K.Vanlalvena chuan Mizoram-ah ramhmul damdawi siamna Small Industry din turin sawrkar laipui a ngen.

Rajya Sabha MP, K. Vanlalvena hian Zirtawpni tlai khan Union Secretary of AYUSH, Vaidya Rajesh Kotecha chu a Office Chamber-ah hmuin, Parliament House-a a lo sawi tawh, Mizoram-a Ramhmul damdawi siamna tur Medicinal plant chungchang leh chumi kaihhnawih thilte a sawipui. Rajya Sabha MP hian ramhmul damdawi siamna Small Industry Mizorama din turin a ngen a, hemi chungchangah hian Union Secretary hian project thehlut turin thurawn a lo pek bakah an project te a lo approve sak tur thu MP hi a lo hrilh a ni. 

Hei bakah hian Mizoram-ah Medicinal plant chi hrang hrang awm sa te chin punna turin Pilot Project kalpui turin a ngen a. Hei pawh hi project thehlut tur leh a lo approve tur thu a sawi a. Khum 50 theuh awm theihna AYUSH Hospital pakhat theuh Aizawl, Champhai leh Hnahthial-ah te din sak turin MP hian a ngen a, AYUSHh Secretary chuan tihhlawhtlin a lo tiam bawk. Hei bakah hian Mizoram MP in Institution of Research and Training in Ayurveda and Homeopathy Mizorama din tura a ngenna chu Health Minister Dr. R Lalthangliana nen an lo sawidun tur thu leh Mizoram in hmun hma a neih that leh thatloh te endik turin amah a lokal tur thu a sawi bawk.

Ayush Minister Shripad Yesso Naik chu COVID-19 a positive avanga Goa-ah quarantine mek a nih avangin K.Vanlalvena hian Secretary hi a hmu ta zawk a ni.

Comments

Chhiar Hlawhte