Mizoram sawrkar in UN Sustainable Development Goals leh Mizoram Vision 2030 hlawhtlin nan hma la

Mizoram sawrkar-a Deputy Chief Minister, Tawnluia chuan Mizoram sawrkar chuan UN Sustainable Development Goals leh Mizoram Vision 2030 hlawhtlin nan hma a la zel a ni, a ti.

Associated Chambers of Commerce of India (ASSOCHAM) buatsaih ‘Emerging North East-Smart Solutions’ nimin-a neih Video Conference kaltlanga khual zahawm nia a hmanpuina ah he thu hi sawiin Deputy Chief Minister chuan Mizoram chu South East Asia ram hnaia awm a nih avangin India tan State pawimawh ber te zinga mi a ni, a ti a. Mizoram chuan tunhnaiah hmasawnna tam tak a nei tih sawiin, chung zingah chuan NITI Aayog in kum 2019 June thlaa Health Index a tihchhuah-ah Mizoram chu India ramah a sang ber dawttu niin, tehna hrang hrang atanga State hrisel leh hnathawk thei tam tak awmna a ni tih a entir a ni, a ti a. Kum 2018-2019 inkara Gross State Domestic Product (GSDP) chu 13.04% a ni a, kum 2018-2019 chhunga State Per Capita Income chu Rs. 1,68,626 a ni bawk a, India ram Per Capita Income chawhrual aiin a sang a ni, a ti a. NITI Aayog buatsaih, Export Preparedness Index, 2020-ah Mizoram chu 23-na niin, Department for Promotion of Industry and Internal Trade (DPIIT) in a tarlan danin Mizoram chuan Foreign Direct Investment (FDI)-ah April, 2000 atanga March, 2019 chhungin US Dollar 116 million a chhunglut a ni, a ti.

Deputy Chief Minister, Tawnluia chuan Mizoram chu hmarchhak state atanga Thei tharchhuak tha State niin, Mega Food Park pawh hawn a ni tih a sawi a, Agriculture leh Horticulture Crops-ah nasa takin hma a sawn thu pawh sawiin, Mizoram sawrkar chuan UN Sustainable Development Goals leh Mizoram Vision 2030 hlawhtlin nan hma ala zel a ni, tiin he huna khual zahawm ni tura sawm a ni chu lawmawm a tih thu a sawi bawk.

Emerging North East Smart Solutions hi Session hnih-a then niin, Session khatna-ah hian NABARD Managing Director, SN. Mallick leh CEO Oil Palm Plantation, Godrej Agrovet, Nasim Ali leh midangte hnen atangin thusawi ngaihthlak a ni a. Session hnihna-ah Sikkim State atangin ASSOCHAM Report tlangzarhna hun hman niin Chairman IIA, Jharkhand ASSOCHAM Skill Council Dr. Sumit Suseelan leh midangte hnen atangin thusawi ngaihthlak a ni bawk.

Comments

Chhiar Hlawhte