Land Revenue and Survey Board thutkhawm nei

Land Revenue and Survey Board chu nimin khan Revenue Minister, Lalruatkima hova thukhawmin Board hmalakna hrang hrang an thlirho.

Land Revenue and Settlement Directorate Conference Hall-a thutkhawm ah hian Revenue Minister, Lalruatkima chuan Revenue Department chu mipui ngheng hnai ber Department te zinga mi, a tel lova awm theih loh, hmasawnna hna tam zawk pawh lei behchhan (land based)-a thawh a ni, a ti. Dan dik taka mipui ten ram kan neih theih nan te, mipui sum sawrkar Revenue-a chhunluh tur Chhiah tam zawk fel fai taka lak a nih theih nan te, ram buai tam tak awm mek chinfel tuma hmalak a nih dan te sawiin, MIRSAC te nena thawkho in ram thliar fel ‘Land Zoning’ tih tum a nih thu a sawi lang bawk.

He thutkhawm ah hian District thar pathum Saitual, Khawzawl leh Hnahthial-ah te Settlement Officer-ten hna an thawh tan tawh thu leh Surveyor pawh dah vek ni tawhin Revenue Office te chu heng District tharah hian tha taka an function theih tawh thu sawilan a ni a. Hei bakah hian Expert Committee on Land Reforms in rawtna an siamte chipchiar taka enho niin rawtna engemawzat sawiho a nih hnuah nimin-a en hmanloh te chu Board thutkhawm leh hmasak bera en chhunzawm leh tura dah a ni.