Chanchin thar thenkhat :

Inrawnkhawmna neih a ni

Nimin khan Mizoram-a Industry leh Entrepreneurship-in hma a sawn zel theihna atana inrawnkhawmna neih a ni. Secretariat Conference Hall-a inrawnkhawmna hi Commerce & Industries Department Minister Dr. R. Lalthangliana hova neih niin Central sawrkarin kalphung thar leh policy a duan zulzuia hmalak theihna tur kawng hrang hrang inhrilhhriat a ni a. Mizoram chhunga MSME-te mumal zawka an awm theih dan turte sawi a nih bakah Mizoram Industry pawl hrang hrangte chuan harsatna an neih te sawiin ngaihthlak a ni a, heng harsatna sutkian a nih theihnan rawtna hrang hrangte siam a ni bawk. He huna tarlan te hi Minister chuan ngaih-thlak sakin, hma lak leh zelna turah pawh Industry neite nen pheikhai rual taka kal nise an ti a, Minister hian Mizoram-ah MSME ten hma an sawn chhoh zelna atan theihtawp chhuah a tum thu a sawi bawk.

By-Laws sawihona neih a ni

UD&PA Department Commissioner & Secretary, Dr. C. Vanlalramsanga hovin nimin khan  UD&PA Director Office chamber-ah ‘Consultative Meeting on The Draft Mizoram Urban Development & Building By-Laws, 2020’ neih a ni a, he By-Laws hi UD&PA buatsaih niin In sak lam kaihhnawih reng reng- sak hma atanga sak lai leh sak thar tur, a thenlai thiah emaw siam-that emaw, In pum thiah emaw, zawm emaw chung-changa zawm turte a huam a. Mizoram chhunga Khawpui 23 tana hman tura buatsaih mek a ni.

Sawrkar chungah lawm

Joint Action Committee on Inner Line Reserve 509 sq mile Demand Mizoram chuan Mizo-ram leh Assam inkar ramri tharum tel lova  chingfel tura India Prime Minister hnena Joint Memorandum an thehluh Mizoram sawrkar in Comment tura an ngenna tih hlawhtlin a ni ta chu lawmawm an tih thu sawiin, Mizo mipuite rawn lova kum 1933-a ramri siam chu lo chawilar lo turin mipui te an chah bawk.

Hliam tuar te tan ruahman

Tunhnaiah Mizoram leh Assam ramri-a buaina thlenga hliam tuar te tanpuina turin Chief Minister, Zoramthanga chuan Chief Minister Discretionary Fund 2020-2021 (2nd Quarter) atangin Rs. 1,10,000/- a ruahman a, he buaina thlenga hliam tuar leh damdawi In-a enkawl zui ngai, Malsawmkima, Bangla Veng, Vairengte chu Rs. 50,000/- pek tura ruahman niin midang mi 6, Vairengte khua vek te chu Rs. 10,000/- theuh pek tura rua-hman a ni bawk.

MSU in Pass thar lawmpui

Mizo Students’ Union (MSU) General Hqrs. chuan Mizoram University Under Graduate Result 2020 chhuaka Mizo zirlai hlawh-tlinna chang zawng zawngte an lawmpui thu nimin khan thuchhuah siamin an tarlang a. MSU thuchhuah tarlan danin BA-ah 73.21%, B.Sc ah 77.83%, B.Com-ah 83.33% leh B.Sc (H.Sc) ah 88.89% in pass in kumin hian a pumpui ah zirlai zaa 80.84 in pass in nikum aiin 16.76% in pass an tam zawk a ni.

Mipuite dawr lo turin ngen

All Mizoram Cement & Iron Rod Dealers Association chuan tunhma atanga Assam leh Mizoram inrina, Vairengte leh Lailapur buaina chawk chhuaktu leh buaina awm apianga a meizang-hlaptu, Raju tia hriat, a hmingpum Rajibuddin Lasker chuan Lailapur-ah Ruma Enterprise, In sakna bungrua Rod leh Cement adt. zawrhna dawr a hawng mek nia sawiin, ‘STAR BRICK’ siamna industry pawh neiin Mizoram-ah a rawn thawn lut nasa hle tih hriat a ni bawk tih an sawi a. Hetianga Mizote tana hnawksak taka a khawsak thin avang hian Lailapur-a a dawr hi Mizo mipui te dawr tawhlo tura ngenin, a Brick pawh hi lei sak tawhlo turin an ngen a. A hminga Mizoram a Motor Register leh a thurualpui Nasir Uddin Laskar-a hminga Mizoram-a Motor register te pawh titawp turin sawrkar an ngen bawk.