Mizoram-a hri kai enkawllai za aiin an tlem ta

Mizoram-a COVID-19 hri kai enkawllai chu mi za aiin an tlem ta a, hri kai hmuhchhuah atanga zaa 95.54 te chu enkawl dam an ni tawh.

Mizoram-a COVID-19 hri kai enkawl mek zingah nimin khan mi 13 te chu enkawl dam leh niin heng mite hi Lunglei District-ah mi 7, CIJW School, Vairengte atangin mi 4 leh Kolasib atangin mi 3 te an ni a, heti hian Mizoram-a hri kai hmuhchhuah zawng zawng chu mi 2220 niin hri kai mi 2121 te chu enkawl dam an ni tawh a, tunah hian hri kai enkawllai 99 an la awm mek a ni.

Niminpiah khan Mizoram-a Sample enfiah atangin COVID-19 hri kai hmuhchhuah thar mi 8 an awm leh a, niminpiah khan ZMC Laboratory-ah Sample 220 enfiah niin COVID-19 hri kai mi pakhat hmuh a ni a, hri kai hmuhchhuah hi hmeichhia kum 43 mi niin Aizawl Dinthar Veng-a cheng a ni a, hri a kaina chhan hi hriat ni lovin chhui chian mek a ni. Niminpiah vek khan Rapid Antigen Test hmangin Mizoram-ah Sample 1092 enfiah niin hri kai hmuhchhuah thar 7 an awm a, heng hri kai zing ami 6 te chu Aizawl khawpui chhung Veng 5 ami te niin Dawrpui Veng-ah mi 2 bakah Ramhlun South, Kanan Veng, Dinthar Veng leh Bawngkawn atangin mi pakhat theuh an ni a, taksa a natna hri kai lanchhuahna nei mi 5 awmin midang pakhat erawh hri kai lanchhuahna neilo a ni a, an zinga pakhat hi State pawn atanga rawn haw a ni thung. Rapid Antigen Test hmanga hri kai an hmuhchhuah pakhat hi Kolasib Dsitrict-a hmuh-chhuah niin Aizawl District mi, Kolasib-a Nurse zirlai a ni thung. Niminpiah khan District hrang hranga TrueNat Laboratory-ah Sample 91 enfiah niin hri kai hmuh thar an awmlo a ni.

India-ah hri kai enkawl dam an pung chho zel :

Darkar 24 kalta chhungin India ramah COVID-19 hri kai hmuh-chhuah thar aiin hri kai enkawl dam 13,809 in an tam zawk. Ministry of Health & Family Welfare chhinchhiahna atanga a lan danin darkar 24 kalta chhung khan India ramah Sample 11,36,183 enfiah leh niin hri kai hmuhchhuah thar 67,708 an awm leh a, darkar 24 kalta chung vek khan hri kai enkawl dam mi 81,514 awmin hri kai hmuhchhuah aiin enkawl dam hi 13,809 in an tam zawk a ni.

Heti hian India rama Sample enfiah zawng zawng chu 9,12,26,305 a tling ta a, heng atang hian COVID-19 hri kai hmuhchhuah chu 73,07,097 niin hei hi Sample enfiah atangin zaa 8 a ni a, hri kai hmuhchhuah atang hian 63,83,441 te chu enkawl dam niin hei hi hri kai hmuhchhuah atangin zaa 87.36 niin tunah hian hri kai enkawllai 8,12,390 an awm bawk. India rama hri kai zingah nunna chan 1,11,266 an awm tawh a, hei hi hri kai hmuhchhuah atangin zaa 1.52 an ni bawk.

Comments

Chhiar Hlawhte