Serchhip damdawi In-a inentir tum zingah COVID-19 hri kai hmuh niin OPD khar lailawk nghal a ni

Nimin khan Serchhip-ah COVID-19 hri kai pakhat hmuhchhuah a nih avangin Serchhip District Hospital-a OPD chu chawhnu lamah khar lailawk nghal a ni a, he thil thleng avang hian mipuite chu chi-ai lo tura chah niin Vawiin lam hian OPD hi khar chhunzawm ala ni ang.

Mizoram sawrkar in zirna In sang thenkhat te nimin atanga dan pangngaia hawng tura ruahmanna a siam tak avangin Hostel-a awm tur zirlaite tan nimin atang khan Rapid Antigen Test hmanga Sample enfiahna chu Serchhip CMO Office kawt-ah hawn niin hemi rual hian Serchhip Hospital OPD-a damlo inentir tura kal pakhat, Serchhip-a awm Assam Rifles nupui chu Rapid Antigen Test hmang hian a Sample enfiah a ni a, COVID-19 hri a kai tih hmuhchhuah a ni ta a ni. Serchhip CMO Office atanga kan thudawnna chuan he damlo inentir tura kal hi OPD Main Building-ah a lut hmanlo tih sawiin, OPD-a inentir tur hian fimkhur takin a rawn kal a, Dental OPD kawt-a damlo thutna ah hming ziah tir hun tur nghaka thuin hetihlai hian a Sample hi enfiah a ni ta tih an sawi a, midang nen inkawmhnaihna an neilo tih an sawi bawk.

Hetianga hri a kai tih hmuhchhuah a nih hnu nimin vek khan a chenpui, a pasal leh a fa te pahnih pawh an Sample enfiah nghal niin anni erawh hri lakah hian an fihlim nia thudawn a ni a, Serchhip damdawi In-a Dental OPD kawt leh CMO Office kawt vel pawh hi damdawi hmanga kah thianghlim nghal niin hri kai hmuhchhuah hi Chhiahtlang Tourist Lodge CCC-ah dah nghal a ni a. He thil thleng chungchangah hian mipuite tan chi-ai na tur a awmloh thu leh mipui ti ralkhel thei thu thehdarh lo turin damdawi In thuneitute chuan mipuite an ngen bawk a ni.

Nimin Serchhip damdawi In-a inentir tum zingah hri kai hmuhchhuah an awm avang hian Serchhip District Hospital OPD chu nimin chawhnu lam khan khar lailawk nghal niin mipuite pawh luh leh chhuah khap sak an ni a, damlo inentir tura lut te chu hemi hnu hian an en leh tih sawiin District Medical Superintendent Dr. ZD. Lalmuanawma chuan, OPD-a kal zawng zawngte chu mahni In lama lo inkhung tur leh midang lo tlawhpawh lo tura tih an nih thu a sawi a, OPD-a kal te hi a tul anga an Sample la enfiah leh tur an nih thu pawh sawiin, Vawiin-ah pawh OPD hi khar ala nih dawn thu leh Emergency-a Doctor rawn duh tan Casualty-ah rawn theih a nih dawn thu a sawi bawk.