MPC Party leh PRISM Party te inchhunfin in Peoples Conference Party (PC Party) tih an ni dawn

Mizoram-a Political party 2- MPC leh PRISM Party te chu party pakhat-ah inchhunfinin Peoples Conference Party (PC Party) tih hming an pu zui dawn.

Heng Party pahnih te hian nimin khan Aizawl-a MPC Party Office-ah Party pakhata inchhunfinna hun hmangin party 2 President, Lalhmangaiha Sailo leh Vanlalruata te chuan Merger Agreement-ah hming ziakin Peoples Conference (PC) Party tih hming hi an pu zui dawn a, he party-ah hian President-ah MPC President nilai, Lalhmangaiha Sailo awm zuiin Sr. Vice President-ah PRISM President, Vanlalruata a awm thung anga, Vice President-ah V. Lalthazuala leh Lalrinzuala Chawngthu te awmin Treasurer-ah SL. Ngursailova Sailo chu a awm bawk ang.

Party pahnih ten inchhunfinna hun an hman ah hian MPC President, Lalhmangaiha Sailo chuan PRISM leh MPC te an inchhunfin thei chu an lawm hle tih sawiin, “Ram hmangaih tak taktu ten kan ram an hruai hun a nghahhlelhawm a, tu candidate leh tu party policy in nge ram hmasawnna min thlen thei ang tih ngun taka ngaihtuah chunga vote thlak a tul tawh takzet a ni,” a ti. PC Party President thar ni bawk chuan, “Therhlo sem policy- MIP, NLUP, NEDP, SEDP leh a dang min tiam hmanga vote kan thlak hian ram siamthatna tur leh hmasawnna tur atan vote kan thlak em? Budget pawisa Development pawisa pawh pen hmang ral vetu ka ni em tih kan in ngaihtuah chian a tul tawh hle a; ram siamthat duhtu ram, hnam leh sakhua himna ngaipawimawhtu zawng zawng te lungrual taka ke pen puiah ka sawm vek che u a ni,” a ti bawk.

PRISM President leh PC Party-a Sr. Vice President thar ni bawk, Vanlalruata pawhin NGO an nihlaia an hmalakna tam takah Brig. T. Sailo-a hunlaia hmalakna chhunzawm a nihloh avanga hmasawnna awmlo an lo hmu teuh tawh tih sawiin, MPC nen an inchhunfin thei chu thinlung taka an lawm thu a sawi a. “Tun-a kan sawrkar hian sum leh pai enkawl kawngah emaw hmalak a thiamlo a; COVID-19 avangin khawvel ram hrang hrang kan buai a, ramdang ten he natna tuar te a thlawna enkawla test pawh a thlawn te a an tih theih laiin kan sawrkar chuan tul miah lovin sum tuakna atana hmangin Mask vuahlo pawisa min chawitir a, mi thahnemngai te sum thawh chu sawiloh, he natna veite enkawlna pawh sum tam tak sen kan la ngai mek a ni,” a ti a. PC Party thar chu a vanneih thu sawiin, “Sum leh pai enkawl chungchangah chuan keini Party aia thiam President nei an awm miahlo a ni,” a ti bawk.