State pahnih Chief Secretary ten inbiakna an nei

Nizan dar 6:30 khan Assam leh Mizoram ramri chungchangah Union Home Secretary, Ajay Kumar Bhalla hovin Mizoram Chief Secretary, Lalnunmawia Chuaungo leh Assam Chief Secretary, Kumar Sanjay Krishna te chuan Video Conference kaltlangin inbiakna an nei.

He inbiakna ah hian Assam sawrkar leh Home Ministry ten ramri buaina hmuna Police dah te hnuhkir nghal nise tia an rawtna chu Mizoram Chief Secretary chuan, Assam lam atanga ramri hrula cheng mipui te nasa taka ti thlabar zawnga hma lak a nih avanga mipuite thlamuan tura Police tlemte dah mai a nih thu sawiin, tun dinhmunah chuan Mizoram Police te hi ramri buaina  atanga  hnuhdawh a rem lo tih a sawi a. Ramri buaina hmuna Assam lam atanga Senior Officer kal ten heng laia Duty Official leh Police Junior zawk te an vau thin chu a dik lo hle a ni tih sawiin, ti tawh lo se tiin rawtna a siam bawk.

Assam lamin tunhnaia Joint Secretary hova inbiakna thutlukna te an zawm nghal laiin Mizoram in engmah an ti ve lo ti a an sawi chu  Chief Secretary chuan, Meeting a remtih angin Oct. 17-a buaina thlen hnua Lailapur bula Mizoram Police Section hnih dah te chu Vairengte lamah hnuhkir a nih tawh thuin a chhang a. Assam leh Mizoram inkara thu inchuh hrang hrang te sawiho a nih hnuin Assam Chief Secretary chuan Mizoram mamawh phurtu motor dan te an tlan leh vat theih nan a hma la tura Silchar DC instruction a pek thu a sawi a, Vawiin-ah chuan Traffic hi a pangngaia che hman tura a beisei thu a sawi a. DC te hriatpuina lovin Officer ten ramri buaina hmun hi tlawh tawh loh nise an ti bawk.