NE te tana India Budget atanga zaa 10 dah Project siamtu ten hriatchian a tul - Larsap

Mizoram Governor, P.S. Sreedharan Pillai chuan India hmarchhak tih hmasawnna atana India in 10% of Budget lai mai a dah hrang chu India Hmarchhak-a cheng, mi tlem te, India ram mipui zinga 3.76 % awrh tan chuan tam tham tak a nih thu leh Project siamtute pawhin an hriatchian a tul thu a sawi.

Mizoram Planning, Economics & Statistical Services (MPESS) tling thar te nen nimin-a Raj Bhavan Banquet Hall-a an inkawmna ah he thu hi sawiin Larsap chuan hetianga India sawrkar in India Budget pumpui atanga zaa 10 lai a dah chu project siamtute pawhin an hriatchian a ngai a, Central atanga sum hailuh kawngah hian tun aia nasa zawka tan a ngai a ni, a ti.

Larsap chuan MPESS 2020 Batch te chu Sawrkar hna hmu thar te an nih anga a lawmpui thu sawiin Sawrkar hna ringawt lo deuh ngaih pawihmawh a tul tawh tih a sawi a. Mizoram leilung te chu thlai chikim in a ngeih em em vek a nih thu pawh sawiin, “Ei leh barah hian kan intodelh pumhlum thei rihlo deuh a nih pawhin kan mamawh zualpui te hi chu kan thawkchhuak thei tih a chiang a. Ei leh bara intodelh tur hian thinlung lamah lo inpuahchah hmasak a ngai thin a. Kan state chhunga kuthnathawh kan hreh laia State pawn lamah kuthnathawka eizawng kan nih leh si chuan insiam that a ngai dawn a ni,” a ti. Agriculture & Allied Sector huanga kuthnathawh thlahdah a sawrkar leh company hna thawh ringawt tum chu midangte thawhchhuahsa hmanga in hraipuar a ngai leh thin tih pawh sawiin, “Inhmuhthiamloh nikhua te pawh awm thei tho a ni a, a him berlo a ni,” a ti a. “India in a thil tum intodelhna – Atma Nirbhar Bharat nei tur hian kawng engkimah rualkhai taka tan kan lak chhoh zel a ngai a; kuthnathawh hmanga ei leh bara intodelhna te pawh kan ngaih pawimawh viau a ngai a ni,” a ti bawk.

Larsap kawmtu Mizoram Planning, Economic & Statistics Service (MPESS)-a lut thar mi 6 te hi kumin kumtir lama Written Test neih tawh kha niin Lockdown avangin September -ah personal interview neiin tunah hian Orientation Programme an hmang mek a ni.

Comments

Chhiar Hlawhte