Latest News

Vaccine pe chhunzawm dawn

 Serchhip District chhunga Health Care Workers te hnena COVID-19 Vaccine, Covishield pek hna thawh mek chu Inrinni leh Pathianni te chawlh anih hnuah Vawiin hian Vaccine pekna tura ruahman hmun thum-ah pek chhunzawm a ni leh dawn a, thudawn danin Serchhip District chhunga mi 450 te hri danna pek turah ni 2 chhung khan mi 306 te chu hri danna hi pek hman an ni a, Presbyterian English School leh Midland M/S-ah mi 121 ve ve te hri danna pek ni tawhin Thenzawl CHC-ah mi 64 te hnenah hri danna hipek an ni tawh bawk a ni.

Home Minister in Piping Ceremony a hmanpui

Nimin khan Home Minister, Lalchamliana’n GS Arya Mess, Mizoram Police Hqrs, Aizawl-ah Constable 161, Honorary Head Constable-a kaisang te hnenah bel pekna hun, Piping Ceremony a hmanpui.

He hunah hian Home Minister chuan Constable te chu Police hna hlenchhuah kawnga kut ke ber pakhat an ni tiin an tel lovin Officer te tan hna thawh hlei theih a ni lo, a ti a. Constable te tan kaisanna remchang a tam lo tih hriain Police hotuten Constable te kaisanna tur ruahmanna a siam a, Sawrkarah bawhzuiin hei hi Sawrkar pawhin awm a ti a, Cabinet ah pharhin Cabinet chuan an remti ta a ni, a ti. Head Constable a kaisang Constable 161 leh an chhungte chu a lawmpui thu sawiin Home Minister chuan, hei hi kum 20 chuang rinawm leh tha taka hna an thawh rah a ni, a ti a. Kaisannain mawhphurna tam zawk a ken tel bakah zahawmna a pek belh thu sawiin, an hnathawh kawngah Police te chu hawihhawm tak chunga mipui te thlamuanpui theih, rinna an nghah ngamna ni zel tur leh mahni inthununa, hmasawn zel tura tan la turin a fuih bawk.

He hunah hian Mizoram DGP, SBK. Singh pawhin thu sawiin Constable te Head Constable ah an kaisan theihna chhan chu Chief Minister, Home Minister leh Chief Secretary ten awm tiin theihtawp an chhuah vang nia sawiin, an chungah lawmthu a sawi bawk

Nimin-a Constable atanga Head Constable a kaisang hi an vaiin mi 161 an ni a, a tam zawk chu Un-Armed niin kum 20 chuang thawk tawh vek an ni. Mizoram Police sanctioned strength hi 12,206 niin thawk lai mek 8750 an awm a, post 3456 ruak an nei mek a. Post ruak awm mek hi post za zelah 28.13 bawr vel a ni a. Heng zinga hian post 2809 te chu Constable leh IV Grade post te an ni, chung zinga post 595 lak tumna hi a kal mek a ni.

Comments

Chhiar Hlawhte