Chanchin thar thenkhat :

Hnampa Zahna hlan a ni

Nimin Oct. 2, 2020 kha India Hnam Pa, Mahatma Gandhi piancham niin rampum ah amah zahna leh chawimawina hun atan hman a ni. India Hnampa, Mahatma Gandhi piancham 151-na ah hian Mizoram-ah chuan amah hriatreng nan leh zahna lantir nan nimin zing khan Mizoram Larsap, P.S. Sreedharan Pillai, Chief Minister Zoramthanga leh Deputy Chief Minister Tawnluia te chuan Aizawl Zodin Square-ah a Lim-ah Parthi dah in zahna an lantir a. Legislative Assembly Speaker, Dy. Speaker, Minister zawng zawng leh MLA thenkhat te, AMC Mayor bakah Chief Secretary, Additional Chief Secretary, GGP, Aizawl DC leh SP ten zahna pangpar an dah bawk a ni.

Mahatma Gandhi piancham hi India Sawrkar-in ram pum chawlh (National Holiday) atana a puan zing ami a ni a. Kum 2007 khan United Nations General Assembly chuan October ni 2 hi ‘International Day of Non-Violence’ ah an lo puang tawh nghe nghe a ni.


Clean Aizawl City hawnna nei

Kum 130-a upa, Aizawl faina leh thiang-hlimna atana hmalatu pawl thar, Clean Aizawl City hawnna inkhawm leh hnatlangpui chu nimin khan Aizawl hming putchhan, Aizawl Centenary Lungphun, Raj Bhawan bulah neih a ni a a, he hun hi Aizawl Municipal Corporation (AMC) Mayor, PC. Lalhmingthanga chuan khuallian nia hmanpuiin Aizawl khawpui neitu thinlung pu a enkawl tur, Clean Aizawl City a ding chu lawmawm a tih thu a sawi bawk.


UPSC Civil Service Exam dawn

Union Public Service Commission (UPSC) chuan Civil Services (Preliminary) Examination, 2020 chu naktuk, Oct. 4, 2020 hian India rampum ah a buatsaih leh dawn a, Mizoram-ah chuan Govt. Mizo Higher Secondary School, Aizawl, Govt. Mizo High School, Aizawl leh Govt. Hrang-bana College, Aizawl te chu Exam Centre tura ruahman a ni.


Mizoram BJP in hun hmang

BJP Mizoram Pradesh chuan nimin khan India Hnampa, Mahatma Gandhi pianchampha pualin Aizawl-a an Office, Atal Bhawan-ah hun an hmang a, he hunah hian an President, Vanlal-hmuaka chuan India Hnampa, Mahatma Gandhi nun atangin entawn tur tam tak a awm thu sawiin, “A ni chuan khawvel hawi zawng a thlak danglam thei a, keini BJP Mizoram Pradesh pawh hian Mizo-ram hawi zawng hi kan thlak danglam ve a ngai a ni,” a ti a. “Sem policy in kan kal ve dawn lo a, nimahsela mi taima leh tih tak taka hnathawkte erawh chuan hlawhtlinna an chang thung dawn a ni,” a ti bawk.


MZP Gen. Hqrs. thukhawm

MZP General Hqrs. chuan nimin khan Executive Committee thutkhawm neiin MZP rorelna sang ber dawttu, Federal Council Sitting chu hripui leng mek thlir chungin October 15, 2020 khian neih turin an ruat a, MZP Assembly (MZP rorelna sang ber) chu November thla chhung ngei a neih nise an ti bawk. MZP General Hqrs. chuan Oct. 27, 2020-a Zirlaite Ni (MZP din-champha) pualin Zirlaiten zirna lam leh nationalism chungchanga an tangkaipui theih tur Media (Cable TV) kaltlanga programme buatsaih relin October thla chhungin College leh University zirlaite tan Quiz buatsaih an rel bawk.


MKHC in Kohhran mipui chah

Mizoram Kohhran Hruaitute Committee (MKHC) nimin a thukhawm chuan COVID-19 hripui laka mipui himna atana sawrkarin inkhuah-khirhna a siam angin hun rei tak Biak in-a inkhawm thei lovin kan awm ta tih sawiin, sawrkar thu-chhuak anga Biak In-a inkhawm neihloh zel rih chu hri laka kan him zawkna tur a nih avangin dawh hram hram turin Kohhran mipuite an ngen a. Pathian Biak In-ah inkhawm theilo mah ila inthlahdah lova chhungkua a Pathian pawlna, Chhung Inkhawm uar zawka lo nei hram hram turin chhungkaw tinte an ngen a. Kohhran mipui te chu Pathianni/Sabbath serh leh Kohhran serh leh sang ngai pawimawh zual turin an chah bawk.

Comments

Chhiar Hlawhte