Latest News

Serchhip-ah Northeast Yatra for Lifestyle (Life) nei mek

Image
India hmarchhak State 8-a tun thla (November) chhunga neih tura ruahman Northeast Yatra for Lifestyle (Life) chu kar hmasa lamah Mizoram tana a hawnna hun hman a nih hnuin Serchhip District-ah pawh kalpui mek a ni a. He Yatra neih chhung hian mipuite hnenah tam zawk leh zau zawkin ‘environment’ humhalh leh venhim pawi-mawh zia zirtirna pek tura ruahman niin tunah hian In tin-a lut lawrin hemi chungchang inzirtirna neih a nih bakah thuziak te sem a ni a. Vawiin hian North Vanlaiphai-ah Mass Rally neiin hman khat daih Plastic thenfai hnatlang neih nghal a ni anga, naktuk-ah Govt. Serchhip College-ah hemi chungchang inzirtirna hi neih leh a ni ang.

Mizoram-a COVID-19 dona kawnga Health Department inbuatsaihna thlirho a ni

Health & Family Welfare Department-in COVID-19 dona kawnga an inbuatsaihna thlirhona chu nimin khan Health Minister, Dr. R. Lalthangliana hovin neih a ni a, he hunah hian hri kai ten an lo kawm hnaih tawh chhui hna thawh dan te thlirho niin hri an kaina chhuichhuah theihloh mi 51 an awm tawh thu tarlan a ni bawk.

COVID-19 dona kawnga Health Department inbuatsaihna thlirhona hun SAD Conference Hall-a neih hi Health Minister, Dr. R. Lalthangliana chuan kaihruaiin Health Minister chuan COVID-19 hri kai nunna chan awm lo tura theihtawp chhuah a nih thu sawiin, Mizoram chhunga COVID-19 hri kai nunna chan kan nei ta chu thinlung taka hrehawm a tih thu a sawi a, anmahni enkawltuten theihtawp tak meuh an chhuah tih sawiin, enkawltute chungah lawmthu a sawi a, nunna chan ta chhungte a tawrhpui thu a sawi bawk.

Tun dinhmunah PPE leikhawl sa a awm that thu he hunah hian tarlan niin Rapid Antigen Test (RAgT) Kit 10,820 leh PPE kit 4000 lei belh turin ruahmanna siam a nih thu leh sawrkara thuneitute phalna lak a nih veleh bawhzui nghal theih a nih thu tarlan a ni. ZMC Laboratory-a Sample Test chu tluang taka kalpui a nih thu leh harsatna a awm rih loh thu report a ni bawk. Civil Hospital, Aizawl-ah COVID-19 Screening point 5 siam a nih thu pawh he hunah hian tarlan a ni a. Hospital Infection Control Committee din a nih thu leh Civil Hospital thianghlimna tura hmalak reng a nih thu tarlan a ni a. RAT Kit lei khawlsa pawh Sero-Surveillance tih nan hman tum a nih thu leh reilote ah hei hi kalpui turin inbuatsaih a nih thu tarlan a ni bawk.

Health Department Contact Tracing Team-in tun thlengin mi 22,492 an chhui tawh thu he hunah hian tarlan a ni a, tun thla chhungin zirna In atanga COVID-19 hri kai mi 54 hmuhchhuah a nih thu leh Office kaihhnawih-ah hri kai mi 33 hmuhchhuah a nih thu tarlan a ni a. Hri an kaina chhuichhuah theihloh mi 51 an awm tawh thu tarlan a ni bawk. Sulhnu Mobile application sawrkarin hmang tura thupek a chhuah chu smart-phone hmang zawng zawng ten chhawr tangkai se a tangkai tur thu pawh tarlan a ni bawk.

Heng bakah hian Private Hospital RAgT tih phalna peka Laboratory Technician te training pek an nih thu leh Public Transport lirthei khalhtute RAgT hmanga sample test theih dan kawng awm se a pawimawh thu sawilan a ni a, COVID-19 hri kai nilo, Non-Covid patient te ngaihthah loh a tul thu te sawilan a ni bawk.

Comments

Popular News (Last 30 Days)